Diyosezi ya Cyangugu yatangije umwaka w'ubutumwa wa 2023-2024 wahariwe Ikenurabushyo ry'umuryango
Iki gikorwa cyo gutangiza umwaka w'Ikenurabushyo wahariwe kwita ku muryango cyabereye muri Paruwasi ya Runyanzovu, kuri uyu wa 24 Nzeri 2023, kiyoborwa na Myr Edouard Sinayobye,umwepiskopi wa Cyangugu ari kumwe n'abapadiri n'abakristu baturutse mu maparuwasi atandukanye.
Mu Nyigisho Musenyeri Eduard Sinayobye yagejeje ku bitabiriye iki gikorwa yibukije abakristu ko buri wese afite ubutumwa bwo kurokora umuryango ngo ube koko ijuru rito rituwemo na Yezu ubwe.
Yagize ati "Umukiza w'isi yavukiye mu muryango, natwe duharanire kuwitaho mbere ya byose. Yezu kristu ni we utuma umuryango ugira igisobanuro cy'ukuri, nitwemerere Yezu tumutunge mu miryango iwacu kugira ngo umuryango ube nk'ijuru rito."
Myr Edouard yibukije abakristu ko batumwe gushaka umuti w'ibibazo bitandukanye byugarije umuryango bimwe bishingiye kuri roho zanduye n'iziri kure y'Imana.
Ati"Dutekereze umuzabibu wImana: Abakiristu bataye ukwemera, abatagisenga, abakeneye kwigishwa no gufashwa, abarwayi, imfungwa n'abari mu bukene bubasuzuguza bigatuma bata Imana."
Mu isengesho yatuye asoza inyigisho, Musenyeri Edouard yagarutse kuri izi ngorane zugarije umuryango, awusabira kwakira urumuri, ukabaho mu mahoro n'umunezero ukomora mu rukundo rw'Imana, kandi ukaba koko isoko y'ubuzima n'igicumbi cy'ubukristu.
Mu bikorwa bizitabwaho muri uyu mwaka harimo : Gutegura mu buryo bwihariye abitegura kurushinga, Guherekeza abamaze guhana Isakaramentu ry’Ugushyingirwa, Gushaka ingo zifite ibibazo no kuzitaho ku buryo bwihariye n’ibindi.
Igikorwa cyo gutangira umwaka w'ubutumwa wahariwe kwita ku muryango cyahujwe no guhimbaza isabukuru y'umwaka umwe paruwasi ya Runyanzovu, yitiriwe umuryango mutagatifu, imaze ishinzwe.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
