Diyosezi ya Gikongoro yasoje ku rwego rwa Diyosezi urugendo rwa Sinodi ku bwuzuzanye mu Butumwa

Nk'uko twabitangarijwe na Myr Eugene Dushimurukundo, umuyobozi wa Komisiyo ya Sinodi muri Diyosezi ya Gikongoro, abakristu b'iyi diyosezi mu nzego z'ubutumwa zinyuranye bakoze ibishoboka ngo baganire ku bibazo bagejejweho n'urwego rwa Roma rushinzwe Sinodi y'Abepiskopi, bifashishije amatsinda anyuranye guhera ku rwego rw'umuryango remezo.

Tariki 3 Gashyantare 2022, ni bwo Myr Celestin Hakizimana, Umwepiskopi wa Gikongoro, yatangije ku mugaragaro imirimo ya Sinodi muri iyi diyosezi. Mu butumwa yagejeje ku bitabiriye iki gikorwa, yashimangiye gahunda ya Kiliziya yo guhuza abana bayo bose ngo bafatanye ubutumwa ntawe usigaye inyuma. Yasabye abapadiri, abihayimana n'abalayiki kwimakaza ubu bufatanye bukaba ishingiro ry'ubuzima bw'abakristu aho bari hose mu nzego z'ubutumwa, uhereye no mu ngo zabo.

Myr Eugene Dushimurukundo, avuga ko muri iki gihe cy'amezi ane, abakristu bibanze cyane ku gusubiza ibibazo bahawe. Nyuma yo kugena amatsinda akorerwamo ibiganiro ari yo imiryango-remezo, amashuri, abakozi,... hakanashyirwaho Komite ku nzego zose zigamije gukurikirana ibikorwa bya Sinodi, abakristu baganiriye ku bibazo bahawe batanga n'ibyifuzo.

Kugira ngo haboneke imyanzuro y'ibyaganiriwe n'abakristu hashyizweho itsinda rigizwe n'abantu 18 baturutse mu maparuwasi na Dowayene zigize iyi diyosezi, maze bahurira kuri diyosezi barebera hamwe ibyo abakristu basubije kuri buri kibazo, bakabihuriza mu nteruro imwe. Iri tsinda kandi ryashyizeho Biro igizwe na Perezida na Vice perezida, umunyamabanga n'abajyanama babiri bakaba barimo guhindura ibisubizo byatanzwe mu rurimi rw'Igifaransa bikazashyikirizwa Komisiyo ya Sinodi ku rwego rw'Inama y'Abepiskopi Gatolika mu Rwanda, bitarenze tariki 30 Kamena 2022.

Myr Eugene, ushinzwe Sinodi muri Diyosezi ya Gikongoro, avuga ko n'ubwo abakristu bagerageje kugira icyo bakora mu rwego rwo kubahiriza igihe bari bahawe, nyamara batabashije kwisanzura uko babyifuzaga mu rwego rwo gutuma iyi Sinodi izana impinduka mu Iyogezabutumwa ry'iyi diyosezi. Akaba ari na yo mpamvu, hateganyijwe ikiciro cya kabiri cy'iyi Sinodi kizatuma abakristu baganira ku bibazo byihariye bibangamiye ubufatanye mu Iyogezabutumwa rya Diyosezi yabo.

Biteganyijwe ko amadiyosezi azaba yamaze kugeza ibisubizo ku Biro by'Inama y'Abepiskopi Gatolika mu Rwanda bitarenze tariki 30 Kamena 2022, hakazahita hatangira imirimo yo guhuza ibisubizo ku rwego rw'Igihugu mbere yo kubyohereza ku rwego rw'Ihuriro ry'Inama z'Abepiskopi mu Karere no ku Rwego rwa Sinodi y'Abepiskopi i Roma.