Dr Monique Nsanzabaganwa yahagarariye Afurika yunze Ubumwe mu gikorwa cyo gutangiza Ihuriro rya Sinodi ku rwego rw'Afurika
Kuri uyu wa 2 Werurwe 2023, Dr Monique Nsanzabaganwa, Umuyobozi wungirije wa Komisiyo y'Afurika Yunze Ubumwe, yahagarariye uyu muryango mu gikorwa cyo gutangiza ihuriro rya Sinodi ku rwego rw'umugabane w'Afurika, kirimo kubera Addis Ababa muri Etiyopiya guhera kuri uyu wa 1 Werurwe 2023.
Nyuma yo kwakira abagera kuri 200 baturutse hirya no hino mu bihugu by'Afurika, kuri uyu wa kabiri ni bwo hafunguwe ku mugaragaro ihuriro rya Sinodi, Igikorwa Cyabereye muri Hotel DE LEOPOL, mu mujyi wa Addis Ababa mu gihugu cya Etiyopiya.
Iki gikorwa cyitabiriwe n'abakristu baturutse hirya no hino muri Afurika bahagarariye inzego zose harimo, Abakaridinali, Abepiskopi, Abapadiri, Ababikira ndetse n'abalayiki banagize umubare munini w'abateraniye muri iri huriro. Kitabiriwe kandi na Dr Monique Nsanzabaganwa, Umuyobozi wungirije w'umuryango w'Afurika yunze ubumwe wanagejeje ku bitabiriye iki gikorwa ubutumwa bw'uyu muryango.
Mu butumwa yagejeje ku bitabiriye iki gikorwa mu izina ry'uyu muryango, yashimiye Ihuriro ry'Abepiskopi muri Afurika ryatumiye uyu muryango muri iki gikorwa cy'ingirakamaro. Avuga ko iyi Sinodi ari isomo rikomeye haba kuri Kiliziya no ku zindi nzego mu kwimakaza ubufatanye no kujya inama mu gufata ibyenezo. Afurika yunze ubumwe ivuga ko ibi ari byo byonyine byafasha Afurika kuva mu bibazo irimo bibangamiye amahoro n'umudendezo w'abayituye nk'umutekano muke, ubusumbane, ubukene n'iyangirika ry'ibidukikije.
Nk'uko akomeza abivuga ibi bibazo bisaba uruhare rwa buri wese mu gushaka igisubizo kirambye kandi kinyuze buri wese. Sinodi rero akaba ari cyo imaze. Guha umwanya n'ijambo buri wese himakazwa kujya inama no gukorera hamwe.
Afurika yunze ubumwe ibona iyi mikorere nk'inkunga ikomeye yayifasha kugera kugera ku ntego zayo zo kwimakaza amahoro n'iterambere rirambye himakazwa ubumwe n'ubufatanye hagati y'amako atandukanye atuye Afurika.
Agaruka kuri gahunda y'Umuryango w'Afurika Yunze ubumwe yo kugera mu mwaka wa 2063, aho Afurika yifuza kuzaba yarubatse Ubumwe busesuye, abantu bashobora kujya mu bihugu biyigize no gucuruza bisanzuye, yagaragajeko bitagerwaho hakirangwa umutekano muke hagati y'ibihugu n'iheza rigirirwa bamwe haba hagati mu bihugu no hagati y'ibihugu ubwabyo. Akaba ari na yo mpamvu gahunda nk'izi ari ingirakamaro mu kubaka umuco w'ubumwe n'ubufatanye ari na wo Afurika ikeneye kugira ngo yubake ubumwe busesuye hagati y'Abayigize.
Biteganyijwe ko iri huriro rizasozwa tariki 6 Werurwe 21023. Ihuriro ry'Inama z'Abepiskopi muri Afurika risanzwe rifite urihagarariye mu muryango w'Afurika Yunze Ubumwe mu rwego rwo gufatanya n'uyu muryango muri gahunda zo kubaka amahoro n'iterambere rirambye muri Afurika.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
