Hervé RIOLS arishimira umusaruro w'ubutumwa amazemo icyumweru muri Komisiyo y'Abepiskopi y'Ubutabera n'Amahoro

Hervé RIOLS waje mu Rwanda ku butumwa bwa Secours Catholique, mu cyumweru amaze yakoranye amahugurwa atandukanye n'ubuyobozi bwa Komisiyo y'Abepiskopi y'Ubutabera n'Amahoro (CEJP), mu rwego rwo kwigira hamwe uko yarushaho guhuza imbaraga mu nzego zayo zitandukanye igamije kurushaho gutanga umusaruro.

"Secours Catholique" isanzwe ifatanya na Komisiyo y'Abepiskopi y'Ubutabera n'Amahoro (CEJP) mu mushinga wo kurwanya ihohotera rikorerwa abagore mu ngo no mu kazi, ushyirwa mu bikorwa na CEJP Rwanda inyuze muri CDJP Cyangugu na CDJP Gikongoro hamwe na CDJP Bukavu na Caritas Goma muri RDC na CEJP Burundi.

Nyuma yo gusoza ibiganiro n'amahugurwa yose yari ateganyijwe, Hervé RIOLS yatangaje ko yishimiye uko imirimo yagenze ashimira Komisiyo y'Abepiskopi y'Ubutabera n'Amahoro uko yamwakiriye n'uko yamufashije kugira ngo imirimo yari imuzanye igende neza.

Yabashimiye Kandi ko bamuhaye umwanya wose yari akeneye batirengagije n'izindi nshingano bari bafite kandi bakaganira bisanzuye n'ubwo ari ubwa mbere bari bakoranye.

Padiri Niragire Valens, Umunyamabanga Mukuru wa CEJP, yashimiye Hervé igihe bamaranye n'uko atababereye umukozi gusa nk'uko ari cyo cyari kimuzanye ahubwo akababera n'umuvandimwe n'inshuti. Yamushimiye uko yabashije kwisanzura mu bantu bari bakoranye ubwa mbere, amwizeza ko amahugurwa bakoze atazaba amasigara cyicaro ahubwo azagirira akamaro CEJP.

Muri uru ruzinduko Hervé RIOLS yari kumwe na Camille Liewig, Ushinzwe gukurikira imishinga Secours Catholique itera inkunga mu gace k'Afurika y'Ibiyaga Bigari na Madagasikari.

Mu gihe cy'icyumweru uretse amahugurwa bahaye abakozi ba CEJP, bakaba baranahuye n'abahagarariye Komisiyo y'Ubutabera n'Amahoro mu madiyosezi, banahura n'abandi bafatanyabikorwa ba CEJP barimo Trocaire na CRS mu rwego rwo kurebera hamwe uko ubufatanye bwarushaho kugira umusaruro.

Komisiyo y'Abepiskopi y'Ubutabera n'Amahoro ikora ibikorwa bitandukanye bigamije kwimakaza ubutabera n'Amahoro mu bantu. Ibi bikorwa ikaba ibifashwamo n'abafatanyabikorwa batandukanye batuma ibasha kurangiza inshingano zayo.

Yongeyeho ko nubwo abantu baba barahisemo kugendera kure y’ikibi, hari igihe Sekibi akomeza kubashuka, bityo hakaba hakenewe guhora basubira ku masezerano ya Batisimu kugira ngo Imana ibongerere imbaraga.

Ati “Ariko rimwe na rimwe iyo umuntu amaze gukura, usanga shitani nyine yongera kutugera amajanja. Niyo mpamvu natwe ababatijwe dusubira mu masezerano yacu ya Batisimu kugira ngo Imana yongere iduhe imbaraga zayo n’urumuri rwayo, bidufashe kugendera mu rumuri rw’abana b’Imana maze twitandukanye n’icyaha, na Sekibi n’imitego yayo yose aho iva ikagera.”