Ihuriro ry'Abepiskopi bagize Inama z'Abepiskopi mu bihugu by'Afurika y'Iburasirazuba ryashyizeho abayobozi bashya
Inteko rusange ya 20 y'Ihuriro ry'Abepiskopi bagize Inama z'Abepiskopi mu bihugu by'Afurika y'Iburasirazuba (AMECEA), yateraniye i Daresalamu muri Tanzaniya, yasoje kuri iki cyumweru tariki 17 Nyakanga 2022, yemeje abayobozi bagize inzego zayo guhera ku muyobozi mukuru.
Mu gitambo cya Misa isoza iri huriro ryari rimaze igihe kigera ku cyumweru ni bwo Arikiyepiskopi Jude Thaddeus Ruwa'Ichi wa Daresalamu yatangaje komite nshya igiye kuyobora iri huriro. Iyi Komite ikaba ikuriwe na Myr Charles Samba Kasonde wo mu gihugu cya Zambiya akaba ari nawe wari usanzwe ayobora iri huriro kuva mu 2018.
Uwatorewe kuba umunyamabanga w'iri huriro ni Padiri Anthony Makunde, umupadiri wa Diyosezi ya Mbeya, muri Tanzaniya. Padiri Emmanuel Chimombo yatorewe guhuza ibikorwa by'Ikenurabushyo muri aka karere k'Iyogezabutumwa naho Padiri Andew Kaufa atorerwa kuba umunyamabanga ushinzwe Itumanaho muri iri huriro.
Mu bandi batorewe guhuza ibikorwa by'iri huriro harimo Padiri Paul Mungwathia Igweta, watorewe guhuza ibikorwa birebana n'iterambere rirambye mu karere ka Afurika y'Iburasirazuba.
Ihuriro ry'Abepiskopi bagize Inama z'Abepiskopi mu bihugu by'Afurika y'Iburasirazuba ryatangiye ku cyumweru tariki 10 Nyakanga 2022, i Daresalamu. Mu gutangiza iri huriro Abepiskopi bitabiriye umuhango wo gutangiza ku mugaragaro Televiziyo Gatolika yo mu gihugu cya Tanzaniya yitwa Capchin TV.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
