Inama y'iminsi ibiri yahuzaga Papa Fransisiko n'Abakaridinali imaze gusozwa
Itangazo ryashyizwe ahagaragara na Vatikani rivuga ko inama y'iminsi ibiri yahuzaga Papa n'abakaridinali yasojwe kuri uyu mugoroba tariki 30 Kanama 2022, hakaba hateganyijwe Misa isomwa na Papa mbere y'uko abakaridinali basubira mu madiyosezi yabo.
Nk'uko bigaragara muri iri tangazo, Iyi nama yatangijwe na Papa Fransisiko kuwa 29 Kanama 2022, yize ku itegeko rishya rigenga ubuyobozi bukuru bwa Kiliziya, nk'uko bigenwa n'Urwandiko rwa Papa Fransisiko yise "Praedicate Evangelium" rwo kuwa 16 Werurwe 2022.
Iri tangazo kandi rivuga ko iyi nama yitabiriwe n'abakaridinali hafi 200, abayobozi ba Kiliziya Y'Aborutodogisi, n'abakuriye ubunyamabanga bwa Vatikani. Ikaba yararanzwe n'urugwiro hagati y'abayitabiriye.
Iri tangazo rikomeza rivuga ko kuba abari muri iyi nama buri wese yarashyizwe mu itsinda ry'ururimi akoresha, byaratumye abayitabiriye bisanzura batanga ibitekerezo, byaba ibirebana n'itegeko rishya rigenga ubuyobozi bukuru bwa Kiliziya, ndetse no kuri Yubile y'umwaka wa 2025.
Nyuma y'iyi nama Papa yayoboye Misa yanitabiriwe n'abakaridinali bitabiriye iyi nama. Muri iyi Misa Papa yasabye Abakaridinali kumenya gutangarira ububasha bw'Imana buhagaritse isi, bukabatera umwete wo kugeza kuri bose inkuru nziza ya Kristu. Yabasabye kandi kudatwarwa n'icyubahiro bahabwa mu Kiliziya ngo kibaviremo gutwarwa n'inyungu z'isi zibatandukanya na Yezu wabatoye akabatuma.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
