Kaminuza Gatolika ya Kabgayi igiye gutangiza Ishami ry'Ubuvuzi
Mu birori byo gutanga impamyabumenyi ku nshuro ya 12 byabaye kuri uyu wa 21 Mata 2023, Ubuyobozi bwa Kaminuza Gatolika ya Kabgayi bwatangaje ko iyi kaminuza igiye gutangiza Ishami ry'Abaforomo n'ababyaza rizakorera I Kabgayi ahahoze ishuri ry'Abaforomokazi.
Mu ijambo ry'uyu munsi, Umuyobozi wa ICK padiri Balthazar Ntivuguruzwa yishimiye kuba ICK ikomeje kwaguka no gutera imbere yongera umubare w'abayigamo n'umubare w'amashami yigisha.
Yagize ati"Mu birori biheruka twababwiraga imishinga dufite yo kwagura amaporogaramu. Iyo mishinga turacyayikomeje kandi turimo kuyinoza neza. Ni imishinga ya porogaramu ya Siyansi mu by'uburezi na porogaramu y'ubuforomo n'ububyaza. Tugeze kure tuzitegura ku buryo twizera kuzazitangiza mu kwezi kwa Cumi uyu mwaka".
Umuyobozi wa ICK yaboneyeho gushimira Myr Smaragde Mbonyintege weguriye ICK ikigo cyahoze gikoreramo Ishuri ry'Abaforomo rya Kabgayi akaba ariho Diyosezi irimo gutegura ngo hazigirwemo abanyeshuri ba ICK mu Ishami ry'ubuforomo n'ububyaza.
Padiri Balthazar avuga ko ICK yiteguye gusubiza ikibazo cy'umubare ukiri hasi cyane w'abita ku buvuzi n'ubuzima bw'abanyarwanda.
Myr Smaragde Mbonyintege, Umwepiskopi wa Kabgayi akaba n'umuyobozi w'ikirenga wa ICK, yavuze ko iri shami ry'Abaforomo n'ababyaza Diyosezi ya Kabgayi yakomeje kurisaba ikaba yishimiye ko igihe cyaryo kigeze. Avuga ko iri shami rizatanga amahirwe menshi kubazaryigamo kuko bazagira akamaro haba mu Rwanda no mu mahanga.
Myr Smaragde kandi yavuze ko abaziga muri iri shami bafite amahirwe kuko bazaba baturiye Maternite y'ikitegererezo irimo kubakwa i Kabgayi bikazabagirira akamaro mu myigire yabo.
Dr Theoneste Ndikubwimana, wahagarariye Minisiteri y'uburezi n'ikigo gishinzwe amashuri makuru na za Kaminuza, yashimiye ICK umuhate yagaragaje mu kwiyubaka yongera amashami n'ibikorwa remezo. Yabashimiye kandi umushinga wo gutangiza Ishami ry'ubuzima avuga ko biteguye kuyifasha kugira ngo uyu mushinga ugerweho. Yaboneyeho gusaba ICK gukoresha neza amahirwe ifite yo kuba iherereye mu Mujyi wa Muhanga nk'umujyi wunganira Kigali. Ayisaba guhora izirikana ko ikwiye kuba imwe mu nkingi Akarere ka Muhanga kegamiye.
Mugabo Gilbert, Umuyobozi wungirije w'Akarere ka Muhanga ushinzwe Imibereho myiza, mu Ijambo rye yashimiye Kaminuza ya ICK ikomeje kongera amashami itanga. By'umwihariko yagarutse ku Ishami ry'uburezi n'Ishami ry'ubuzima igiye gutangiza.
Avuga ko iri shami ry'ubuvuzi rizaba riri no hafi y'ibitaro bya Kabgayi riziye igihe kuko rije mu gihe Ibitaro bya Kabgayi byazamuwe mu ntera bikava ku bitaro by'Akarere bikaba ibitaro bya Kaminuza.
Kaminuza Gatolika ya Kabgayi Itanze impamyabumenyi ku nshuro ya 12. Kugera ubu ikaba itanga amasomo muri porogaramu zitandukanye zirimo Itangazamakuru, ubukungu, imbonezamubano n'uburezi. Kuri iyi nshuro abahawe impamyabumenyi bakaba ari 323.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
