Kardinali Fridollin Ambongo yageze i Kigali

Ku Isaha ya Saa Yine ni bwo Karidinali Ambongo yageze i Kanombe. Mu ndege ya Etiyopiyani, yururutse ku Kibuga cy'Indege i Kanombe ari kumwe na Mugenzi we, Nyiricyubahiro Antoni Karidinali Kambanda, Arikiyepiskopi wa Kigali.

Akigera ku Kibuga cy'Indege i Kanombe yakiriwe mu cyubahiro kimukwiye nk'uhagarariye Abepiskopi muri Afurika akaba n'Umujyanama wihariye mu bajyanama b'Imena umunani ba Papa Fransisiko.

Karidinali Fridollin Ambongo, ageze i Kigali ku nshuro ya mbere kuva aho abereye Karidinali tariki 5 Ukwakira 2019. Aje kwitabira Inama ya Komite Ihoraho y'Ihuriro ry'Inama z'Abepiskopi muri Afurika na Madagasikari, irimo kubera i Kigali. Mu ngingo iziga hakaba harimo no gutegura Inteko rusange y'iri huriro na yo iteganyijwe kuzabera i Kigali tari 30 Nyakanga 2025 kugera tariki 4 Kanama 2025.

Uretse Kardinali Ambongo iyi nama yanitabiriwe n'abandi Bepiskopi bahagarariye Ihuriro ry'Inama z'Abepiskopi mu Turere Dutandatu tugize Afurika n'Abagize Komite Nyobozi y'Ihuriro ry'Inama z'Abepiskopi muri Afurika na Madagasikari. Abepiskopi bitabiriye bose hamwe bakaba bagera kuri 11 baturutse mu bihugu icyenda bitandukanye.

Abepiskopi bategerejwe muri iyi nama akaba ari: Myr Emmanuel Badedjo wo muri Nijeriya, Myr Lucio Andrice Muandura wa Mozambique, Myr John Macwilliam Gordon wa Algeria, Myr Benjamin Ramaroson wa Madagaskar, Myr Willem Christiaans wa Namibia,Myr Gabriel Kumordji wa Ghana, Myr Goetbe Djitangar wa Tchad, Myr Stephen Dami Mamza wa Nijeriya, Myr Anthony Muheria wa Kenya na Myr Moko Ekanga wa DRC.

Biteganyijwe ko iyi Nama izasorerezwa i Kibeho tariki 28 Ugushyingo 2024, ku munsi w'Isabukuru ya 43 y'Amabonekerwa ya Kibeho akaba n'Umunsi Mukuru wa Bikira Mariya Nyina wa Jambo.