Karidinali Kambanda yahawe ku mugaragaro ubuyobozi bwa Bazilika yitiriwe Mutagatifu Sigisiti i Roma

Uyu muhango wabereye muri iyi kiliziya mu Gitambo cya Misa cyayobowe na Karidinali Kambanda ubwe. Nyuma y'Indirimbo Itangira yaririmbwe mu Kinyarwanda n'abanyarwanda bari baje Kwifatanya na we n'indamutso itangira Igitambo cya Misa hasomwe ibaruwa ya Papa yagize Karidinali Myr Antoni Kambanda, ikanamugira Titulaire wa Kiliziya ya Mutagatifu Sigisiti i Roma.

Uretse Indirimbo Itangira yari mu rurimi rw'Ikinyarwanda, isomo rya mbere na ryo ryasomwe mu Kinyarwanda,hakurikiraho Ivanjili n'Inyigisho yatanzwe na Karidinali Kambanda mu rurimi rw'Igitaliyani. Mu nyigisho ye akaba yagarutse ku bumwe, Ubufatanye n'ubutumwa bikwiye kuranga abakristu nk'uko Kiliziya idahwema kubyibutsa muri iki gihe.

Muri iki gitambo cya Misa hari abandi bifatanyije na Karidinali Kambanda barimo Karidinali Juseppe Bertello, Myr Anselmo Guido wahoze ari Intumwa ya Papa mu Rwanda, Myr Rugambwa Protais ukomoka mu gihugu cya Tanzaniya akaba Umunyamabanga muri Propaganda fide, Mgr Salvatore Niciteretse, Umwepiskopi wa Bururi mu gihugu cy'u Burundi; n'abapadiri biganjemo abanyarwanda bakorera ubutumwa i Roma n'abalayiki bahatuye barimo n'urubyiruko ruhiga.

Kugirwa Umuyobozi w'imwe muri Kiliziya ziri i Roma, ni igikorwa kigamije kugaragaza ubumwe bwihariye Karidinali afitanye na Papa nk'Umwepiskopi wa Roma. Bikaba bigaragaza ku buryo bufatika ko ari umwungiriza wa hafi wa Papa.