Karidinali Kambanda yatangije ku mugaragaro Forumu ya 19 I Kabgayi

Imihango yo gufungura ku mugaragaro iyi Forumu yabereye mu Gitambo cya Misa yayobowe na Karidinali Antoni Kambanda, Arikiyepiskopi wa Kigali. Yari kumwe Kandi n'abandi bepiskopi barimo Myr Smaragde Mbonyintege, Umwepiskopi wa Kabgayi, Myr Serviliyani Nzakamwita, Myr Celestine Hakizimana, Myr Visenti Harolimana, Myr Anaclet Mwumvaneza na Myr Frederic Rubwejanga. Igitambo cya Misa Kandi cyitabirriwe n'abapadiri basaga 80 baje baherekeje urubyiruko. Hari Kandi abayobozi bakuru barimo Minisitiri w'urubyiruko n'umuco, Umuvunyi mukuru na Guverineri w'Intara y'Amajyepfo.

Mbere y'igitambo cya Misa urubyiruko rwabanje gukora umutambagiro wavaga mu Mujyi wa Muhanga ahari College Sainte Marie Reine rugana I Kabgayi kuri Bazilika Nto. Uyu mutambagiro waranzwe n'ibyishimo bikomeye byagaragaye ku rubyiruko rutaherukaga iyi Forumu, washojwe n'umuhango wo guhererekana umusaraba hagati ya Diyosezi ya Kabgayi na Diyosezi ya Gikongoro yaherukaga kwakira iyi Forumu.

Musenyeri Smaragde Mbonyintege, Umwepiskopi wa Kabgayi yahaye ikaze Abepiskopi, abayobozi n' urubyiruko rwaje I Kabgayi. Yibukije ko Kabgayi ari yo yakiriye bwa mbere iyi Forumu. Avuga ko yishimiye kongera kuyakira kuri iyi nshuro. Yiseguye kuba Diyosezi itabashije kwakira benshi nk'uko yabyifuzaga avuga ko byatewe n'uko iyi Forumu yateguwe Igihugu kigihanganye na Covid-19 bigaruma yiyemeza kwakira bake bagacumbikirwa Bose aho kujya mu miryango. Yashoje abwira urubyiruko ko abakunda Kandi ko abateze amatwi n'ubwo atabashije kubabwira byinshi.

Mu nyigisho ye Karidinali Antoni Kambanda yabwiye urubyiruko ko n'ubwo bugarijwe na byinshi bigambiriye kubambura ubuzima badakwiye gukangarana kuko bafite Yezu ubakunda Kandi ufite ububasha bwo kubakixa urupfu. yababwiye ko Kandi bafite Kiliziya, ababyeyi n'inshuti babegereza Yezu ngo abakize Kandi abahumurize. Yasabye ababyeyi kumenya gutura abana babo Yezu aho kujya mu bapfumu n'abandi bahanuzi babayobya. Yasabye Kandi urubyiruko kwirinda ingeso mbi no kwitabira isengesho kuko ribarinda korekwa n'intege nke 'umubiri.

Mu byishimo byinshi n'umutima urangamiye umusaraba wa Yezu urubyiruko rwakomeje gusenga mu gitambo cya Misa yaririmbwe na Pueri Cantores y'i Kabgayi imaze kumenyerwa mu gufasha abakristu b'i Kabgayi gusenga no guhimbaza minsi mikuru ikomeye ibera muri Bazilika.

Mbere y'umugisha usoza igitambo cya Misa hatanzwe ubutumwa butandukanye bwatanzwe n'abayobozi bitabiriye ibi birori. Padiri Evariste Nshimyumuremyi, Omoniye w'urubyiruko ku rwego rw'igihugu yahaye ikaze abitabiriye iyi Forumu. Avuga ko iyi Forumu yitabiriye n'urubyiruko 942, abakobwa 500 n'abahungu 442. Yitabiriye Kandi n'abapadiri 88, abafaratiri 50, ababikira 30 n'abafureri 10. Yasabye urubyiruko kuzakurikira neza ibizabera muri iyi Forumu kugira ngo bizabagirire akamaro.

Myr Serviliyani Nzakamwita, Perezida wa Komisiyo y'Urubyiruko yavuze ko yishimiye ko iyi Forumu ibaye akiri Perezida w'iyi Komisiyo dore ko yatangiye ikiruhuko cy'izabukuru. Yaboneyeho gusezera ku mugaragaro urubyiruko rutegereje undi Abepiskopi bashinga kuyobora iyi Komisiyo.

Mu bandi batanze ubutumwa Kandi muri iki gikorwa harimo Umuvunyi mukuru, Honorable Nirere Madeleine, wasabye urubyiruko kugira uruhare mu bikorwa byo kurwanya ruswa m'akarengane. Minisitiri w'urubyiruko n'umuco Rose Mary Mbabazi, Yasabye urubyiruko kurengera ubuzima nk'impano ikomeye y'Imana bakirinda ibiyobyabwenge n'ibindi byangiza ubuzima maze bakazaramba Kandi bakagirira akamaro Igihugu na Kiliziya. Yashimiye Kiliziya uruhare igira mu bikorwa bitandukanye by'uburezi n'iterambere ry'igihugu. Yashimiye by'umwihariko iyi gahunda ya Forumu asaba urubyiruko rw'abakristu kuyikoresha neza rukabera abandi urugero birinda ubunebwe, gikoresha nabi ikoranabuhanga, birinda ubusambanyi Kandi bagira uruhare mu buzima bwa Kiliziya n'ubw'igihugu.

Myr Nzakamwita Kandi yavuze ko urubyiruko rwishimiye iyi Forumu ibaye nyuma y'ibihe bikomeye bya COVID 19 byazahaje urubyiruko. Yashimiye Kabgayi yakiriye avuga ko bayishimiye kuko ari nkuru ikaba ari umurwa w'iyogezabutumwa mu Rwanda. Yibukije byinshi urubyiruko rwungukira muri Forumu mu bikorwa byo gusenga, inyigisho n'imyidagaduro asaba urubyiruko kuzungukira byinshi muri iyi Forumu.

Mu Ijambo risoza ari na ryo ryanatangije ku mugaragaro ibikorwa bya Forumu Karidinali Kambanda yashimiye urubyiruko uruhare rwagize mu bikorwa byo guhangana na Covid-19. Yasabye ababyeyi korohera abana babo bari mu ngorane bakabahumuriza. Yasabye urubyiruko gushyigikirana bamwe bakabera abandi abarinzi mu rwego two guhangana n'ibyonnyi bibugariza.

Igitambo cya Misa gihumuje urubyiruko rwishimiye gufata amafoto y'urwibutso hamwe n'Abepiskopi n'abasaserdoti mbere yo gukomeza n'ibindi gahunda. Biteganyijwe ko iyi Forumu izasozwa kuri iki cyumweru tariki 21 Kanama 2022.