Kiliziya igiye guhimbaza yubile y'ibikorwa by'itumanaho

Iyi nama yari mu rwego rwa gahunda ya Kiliziya yo kugendera hamwe, ikaba yahuje abashinzwe sirivisi z'itumanaho mu bihugu byose, yari igamije guhuza amakuru ku buryo urwego rw'itumanaho gatolika ruhagaze no guhuza amakuru kuri gahunda z'itumanaho gatolika ku isi.

Muri gahunda zagarutsweho muri iyi nama harimo gahunda yo guhimbaza umunsi mpuzamahanga w'itumanaho uba ku cyumweru cya Asensiyo n'izindi gahunda zigamije gufasha abakora mu rwego rw'itumanaho za Kiliziya gukora uyu murimo bagendera hamwe n'abandi aho bari hose mu mpande zose z'isi.

Muri iyi nama abashinzwe itumanaho mu nama z'abepiskopi bagaragaje uko bahimbaza uyu munsi n'uko bubahirizwa ibiteganywa na Kiliziya birimo no gutanga ituro rigamije gushyigikira itumanaho. Myr Janvier Yameogo, wari uhagarariye Dikasiteri ishinzwe Itumanaho yasabye ko uyu munsi warushaho guhabwa imbaraga ugafasha Kiliziya guteza imbere urwego rw'itumanaho no kuganira ku bibazo bigezweho bishingiye ku itumanaho n'isakazamakuru.

Madamu Natasha ukora mu biro bishinzwe iyogezabutumwa i Vatikani yamenyesheje abashinzwe itumanaho ko tariki 24 Mutarama 2025, Kiliziya izahimbaza yubile y'ibikorwa by'itumanaho. Asaba inzego zose kuzategura iyi yubile no kuzayihimbaza neza kugira ngo izasigire Kilziiya icyerekezo gishya mu guteza imbere ibikorwa by'itumanaho.

Mu bindi byagarutsweho muri iyi nama harimo guteza imbere uruhare rw'urubyiruko mu itumanaho gatolika no guteza imbere ikoranabuhanga rigezweho mu itumanaho. Myr Janvier Yameogo, avuga ko kugera ubu Kiliziya n'ubutumwa bwayo bitagaragara uko bikwiye ku mbuga nkoranyambaga asaba ko hashyirwa imbaraga mu mishinga iteza imbere umwanya w'urubyiruko n'ikoranabuhanga mu itumanaho n'itangazamakuru gatolika.

N'ubwo inama nk'izi zitari zimenyerewe abitabiriye iyi nama bishimiye guhura no gusangira imibereho y'urwego rw'itumanaho gatolika bifuza gukomeza kugendera hamwe muri uru rwego kugira ngo rurusheho gutera imbere uko bikwiye.