Komisiyo y'Abepiskopi y'Ubutabera n'amahoro yagejeje ku bo mu gihugu cya Eswatini ubuhamya ku ruhare rw'amadini mu rugendo rw'ubwiyunge

Ku butumire bw'umuryango wa Bibiliya mu gihugu cya Eswatini, umunyamabanga wa Komisiyo y'Abepiskopi y'Ubutabera n'Amahoro yakoreye uruzinduko mu gihugu cya Eswatini mu rwego rwo kwitabira igikorwa cy'Amasengesho yo gusabira igihugu.

Mu kiganiro yagejeje ku bahagarariye amadini n'imiryango itari iya Leta, Padiri Valens NIRAGIRE yagarutse ku buhamya bw'u Rwanda mu rugendo rwo kubaka ubwiyunge n'uruhare amadini yagize muri uru rugendo. Muri iki kiganiro, Padiri Valens yagarutse kuri Sinodi idasanzwe yateguwe na Kiliziya mu mwaka wa 2000, igamije gufasha abanyarwanda kuganira ku kibazo cy'amoko. Yagarutse kandi no ku bikorwa bitandukanye bigamije kubaka amahoro n'ubwiyunge birimo na gahunda zo gushishikariza abanyarwanda kuvuga ukuri muri Gacaca ndetse no gushishikariza abahamwe n'icyaha cya Jenoside gusaba imbabazi n'abarokotse Jenoside bakagira ubutwari bwo bwo kubabarira ababahekuye.

Padiri Valens NIRAGIRE, yagaragaje ko amadini na Kiliziya Gatolika by'umwihariko, amateka yabahaye umwanya wo kwibuka umuhamagaro wayo, wo kubaka ubumwe n'amahoro arambye. Ibi byabaye intandaro yo kwimika umuco wo gushyira hamwe no kwirinda kurangazwa n'ibitekerezo bya politiki binyuranye ahubwo bagashakira hamwe icyagirira abantu akamaro.

Muri uru ruzinduko rwamaze igihe cy'iminsi 4, Padiri Valens wari kumwe n'Abayobozi b'Umuryango wa Bibiliya mu Rwanda, uretse kwitabira amasengesho yo gusabira igihugu, yanakiriwe na Minisitiri w'Intebe wungirije w'igihugu cya Eswatini ndetse anifatanya mu gitambo cya Misa ya Penekositi n'umwepiskopi umwe uyobora diyosezi imwe iki gihugu gifiti.