Komisiyo y'Abepiskopi y'Ubutabera n'Amahoro yatangije Noveni yo Kwibuka ku nshuro ya 29 ku rwego rwa Kiliziya Gatolika mu Rwanda
Kuri uyu wa 27 Mata 2023, mu Rwanda hose abakristu Gatolika baratangira Isengesho ry'Iminsi icyenda rizwi nka Noveni, ritegura umunsi Kiliziya Gatolika mu Rwanda yageneye kwibuka no gusabira abazize Jenoside yakorewe Abatutsi mu 1994 uteganyijwe kuwa 6 Gicurasi 2023.
Igikorwa cyo gutangiza iyi Noveni kikaba cyarabereye kuri Radio Maria Rwanda, aho abakora ku bunyamabanga bw'iyi komisiyo ku rwego rw' igihugu bahuriye n'abakorera ku rwego rw' Arikidiyosezi ya Kigali, bavugira hamwe iri sengesho banazirikana ubutumwa bujyana na ryo.
Nk'uko bisobanurwa n'umunyamabanga wa Komisiyo y'Abepiskopi y'Ubutabera n'Amahoro, Padiri Valens Niragire, iyi Noveni ni umwanya wihariye wo gusabira abazize Jenoside yakorewe Abatutsi, abo yasigiye ibikomere ku mutima no ku mubiri ndetse no gusaba ngo inabi itsindwe burundu mu mitima y'abanyarwanda himikwe ubumuntu, ubuvandimwe n'ubukristu nyabwo bwubaha ubuzima.
Nk'uko byatangajwe mu ibaruwa igenewe abakristu ya Karidinali Antoni Kambanda, Arikiyepiskopi wa Kigali akaba na Perezida w'Inama y'Abepiskopi Gatolika mu Rwanda ari nawe uyobora Komisiyo y'Ubutabera n'Amahoro, iyi Noveni itegura umunsi wo kwibuka ku rwego rwa Kiliziya Gatolika mu Rwanda izakorwa mu ngo z'abakristu, mu ngo z'abapadiri n'abihayimana, mu miryango y'agisiyo gatolika no mu yandi makoraniro y'abakristu.
Iyi Noveni iratangira kuri uyu wa 27 Mata 2023 ikazarangira kuwa 5 Gicurasi 2023. Kuri Radio Maria Rwanda ikazajya itangira Saa 15h20, nyuma y'ishapule y'impuhwe z'Imana.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
