Komosiyo y'Ubutabera n'Amahoro ikomeje gutanga amahugurwa ku kurwanya ihohoterwa rishingiye ku gitsina

Bamwe mu bahagarariye komisiyo y'ubutabera n'Amahoro mu Rwego rwa Paruwasi ya Cyahafi, abahagarariye ingo z'ikitegererezo muri paruwasi, abagize inshuti z'umuryango, abagize umugoroba w'umuryango, abarimu n'abayobozi bashinzwe imibereho myiza n'iterambere mu tugari ni bo bagize itsinda ry'abantu 30 ryahuguwe ku mategeko muri gahunda yo gukumira no kurwanya ihohoterwa rishingiye ku gitsina mu mushinga ugamije ubukangurambaga ku kurwanya ihohoterwa rishingiye ku gitsina.

Atangiza aya mahugurwa Soeur Epiphanie Umubyeyi wo mu muryango wabari bumutima wa Bikiramariya ukorera ubutumwa mu nama y'Abepesikopi gatolika mu Rwanda, muri Komisiyo y'Ubutabera n'Amahoro ushinzwe kurwanya ihohoterwa, yavuze ko kongera guhugura abagize komite yashyizweho ishinzwe kurwanya ihohoterwa rishingiye ku gitsina bigamije kongerera abagize komite ubushobozi bwo kunoza umurimo wo gukomeza kurengera no gukumira ihohoterwa riri mu muryango hagamijwe gushaka igisubizo cya gikirisitu kuri iki kibazo.

Karekezi Theogene, impuguke mu byo kurwanya ihohoterwa rishingiye ku gitsina, yasobanuye ko amwe mu mategeko agomba kubahirizwa muri gahunda yo kurwanya ihohoterwa iryo ari ryo ryose.

Yavuze kandi ko ingamba za Leta n'ubushake bwa Politiki n'amategeko yashyizweho kugira ngo akumire ihohoterwa rishigiye ku gitsina byunganirwa n'ingamba zishingiye ku byo abantu ubwabo biyemeza mu guhangana n'ihohoterwa. Yibukije ko ikibazo cy'ihohoterwa kitareba ubugenzacyaha gusa ahubwo buri wese agomba kugira icyo akora.

Paadiri Agric Paul GUMANOSHABA, waje ahagarariye padiri mukuru wa Paruwasi ya Cyahafi yavuze ko ihohoterwa iryo ari ryo ryose ridakwiye mu bakristu no mu miryango kuko rinyuranyije n'umugambi w'Imana w'urukundo n'ineza.

Yagize ati "Imana ikunda amahoro, ikunda ko habaho ibyishimo mu bantu, ntabwo ikunda ko habaho ihohoterwa. Kiliziya ya mbere ihera mu muryango. Iyo dushaka ko Kiliziya ibona amahoro, bigomba guhera mu miryango."

Akomeza agira ati "Ni inshingano za buri wese rero, agashyiramo imbaraga ze kugira ngo turwanye ihohoterwa. Buri wese rero agire urwo rukundo rwo kurwanya ikibi, kugira ngo habeho amahoro nibyishimo."

Ku ruhande rwa Komisiyo y'Ubutabera n'Amahoro mu rwego rwa Paruwasi ya Cyahafi, Jean Louis Hakizimana, uhagarariye iyi Komosiyo, yavuze ko hari intambwe imaze guterwa mu kurwanya ihohoterwa binyuze muri iyi gahunda.

Ati "Turashimira cyane inama y'Abepisikopi by'umwihariko Komisiyo y'Ubutabera n'Amahoro yatekereje kandi ikanashyira mu bikorwa ubukangurambaga ku kibazo cy'ihohoterwa rikorerwa mu muryango. Hari ibimaze gukorwa, imibare y'abana baba ku muhanda igenda igabanuka, ku bijyanye n'abangavu babyarira mu rugo nabo imibare igenda igabanuka kandi rwose turashimira Imana kuko n'ibindi byose bizagerwaho. Twizera ko ku bufatanye n'iyi komite twahuguye hari undi musaruro bizatanga mu minsi iri imbere."

Umushinga ugamije kurwanya ihohoterwa rishingiye ku gitsina ni gahunda ya Kiliziya gatolika ihuriyeho n'itorero Angirikani ry'u Rwanda .Watangiye mu mwaka wa 2017, kugera ubu ukaba ukorera muri zone eshatu ari zo umujyi wa Kigali: Paruwasi ya Cyahafi na Gishaka muri kiliziya gatuolika ndetse n'itorero Angirikani rya Rutunga . Mu majyaruguru ni paruwasi ya Mutete n'itorerero ry'Abangirikani rya Gaseke.

Mu Majyepfo ni muri Paruwasi ya Ngoma no mu itorero ry'Abangirikani Katedarali ya Butare.

Uyu mwaka hakazibandwa cyane ku buvugizi binyuze muri za komite zatowe zishinzwe kurwanya ihohooterwa rishingiye ku gitsina.

Musabwamana Judith, umwarimu ku ishuri rya GS Kabusunzu, yavuze ko bifuza ko amahugurwa yakomeza kugira ngo abantu bose bagire ubumenyi ku ihohoterwa kandi bafatanye mu kurirwanya. Ati "nkanjye kuba nahuguwe biramfasha kwegera abana nkabasangiza icyo itegeko rivuga ku ihohoterwa kuko nabo ubwabo bashobora guhohotera bagenzi babo. Turasaba ko komisiyo y'ubutabera n'amahoro ibishoboye yajya imanuka ikongera ikaganiriza abana,cyane cyane abangavu n'ingimbi ku ihohoterwa rishingiye ku gitsina kuko byongera imbaraga mu byo tubigisha bakarushaho kubyumva."