"Kwibuka Padiri Ubald RUGIRANGOGA ni ukwibuka umunyarwanda wabaye umuhamya n'intumwa y'inzira y'ubumwe n'ubwiyunge", Myr Edouard Sinayobye

Umuhango wo kwibuka no gusabira nyakwigendera padiri Ubald Rugirangoga ku nshuro ya gatatu, wabaye kuri iki cyumweru tariki 7 Mutarama 2024, ubimburirwa n'igitambo cya Misa cyatuwe na Myr Eduard Sinayobye, umwepiskopi wa Diyosezi ya Cyangugu.

Uretse abihayimana batandukanye, uyu muhango wanitabiriwe kandi n'ubuyobozi bw'uturere twa Rusizi na Nyamasheke, abakristu baturutse muri diyosezi ya Cyangugu no mu yandi madiyosezi ndetse n'inshuti za nyakwigendera padiri Ubald na diyosezi ya Cyangugu zaturutse hanze y'u Rwanda nka Repulika Iharanira Demokarasi ya Congo n'ahandi.

Mu ijambo Myr Edouard Sinayobye, yavuzeko kwibuka nyakwigendera padiri Ubald RUGIRANGOGA ari ukwibuka isengesho n'akamaro karyo mu buzima bwa muntu.

Ati" twese turi abahamya, haba buri wese ku giti ke ariko hari n'ubuhamya twumva hirya hino, abantu bavuga bati' padiri Ubald niwe watugiraga inama, niwe warihiraga abana bacu ishuri kuko twari abakene, niwe wazaga kudusura akaduhoza'. Padiri Ubald ni umuntu w'ineza ku bantu bose haba hano iwacu ku buryo bw'umwihariko ndetse no mu mahanga. Kwibuka padiri Ubald, ni no kwibuka isengesho, umwanya waryo n'akamaro karyo mu buzima bwa muntu ku giti ke mbere yo kuritoza abandi. Umuntu ufata umwanya akagororokerwa kugira ngo ashyikirane n'Imana. Padiri Ubald ni umusaseridoti wasengaga cyane, iyo tumwibuka tuba twibuka izo ndangagaciro nziza z'umusaseridoti natwe bikadutera kwibaza uburyo twamwigana."

Myr Sinayobye yakomeje avuga kwibuka padiri Ubald ari ukwibuka kandi umunyarwanda wabaye umuhamya n'intumwa y'inzira y'ubumwe n'ubwiyunge mu banyarwanda.

Ati" kwibuka Padiri Ubald ni no kwibuka umuntu, umunyarwanda wabaye umuhamya n'Intumwa y'inzira y'ubumwe n'ubwiyunge.

Imana yamuhaye umutima wagutse cyane, ibyiciro byose by'abantu uko bameze akabafasha. Imana yamuhaye ijambo abwira abakoze icyaha cya jenoside yakorewe abatutsi, Imana imuha ijambo abwira abayirokotse, ijambo rihoraho ridahinduka kubera uko amarangamutima y'umuntu ahindutse, ni ukuvuga ijambo rifite urumuri rw'ivanjiri. Cyane cyane urukundo yakundaga abamuganaga bose cyane cyane abahungabanyijwe na jenoside akabafatira umwanya uhagije. Abantu benshi njya numva bamwita inshuti yabo y'umwihariko. Turahimbaza rero ubwo butumwa bwunga abantu, bwegera ubabaye wese, bukamufasha, bukamwumva, bukamutega amatwi bukamugirira impuhwe. Turamwibuka, turibuka ishyaka rye ryo guhuza abantu n'Imana. Yari yaramenye iryo banga ko amahoro y'Imana aturuka mu guhura n'imana haba hano mu gihugu cyacu ndetse no mu mahanga. "

Padiri Jean Robert Rubayita, ushinzwe aka  gasozi k'Ibanga ry'amahoro kashinzwe na Padiri Ubald RUGIRANGOGA, yavuzeko kumwibuka ari ugushimira Imana yamubahaye kandi anashimira Nyiricyubahiro Mgr Eduard Sinayobye we udahwema gusura Ibanga ry'amahoro kimwe n'abasaseridoti bo muri diyosezi ya Cyangugu no muyandi madiyosezi ku rukundo bagiriye Padiri Ubald RUGIRANGOGA.

Reverien Rugwizangoga, umuvandimwe wa Ubald RUGIRANGOGA, mu izina ry'abo mu ryango we bari bitabiriye uyu muhango wo ku mwibuka, yavuzeko Padiri Ubald yaranzwe no gushengerera yezu kristu mu ukaristia kandi akaba n'umuhamya w'uko Yezu kristu akiza.

Mu gusoza uyu muhango wo kwibuka no gusabira Padiri Ubald, hamuritswe ishusho ye yabumbiwe muri Pologne ikaba yahawe umugisha na Nyiricyubahiro myr Eduard Sinayobye, wanashimye abagiraneza bo mu mahanga barimo Inshuti ikomeye ya Padiri Ubald Rugirangoga ituye muri Leta Zunze Ubumwe za Amerika, Katsey Long na Padiri Leszek w’i Kibeho wakoranye n’uwayibumbaga ariwe Ladislas.

Katsey Long, mu butumwa bwe bwagejejwe ku bitabiriye uyu muhango busomwe na padiri Jean Robert Rubayita, yagaragaje ko kuri iyo shusho, Padiri Ubald yerekeza abantu kuri Yesu.

Padiri Ubald yavutse muri Gashyantare 1955. Avukira mu yahoze ari Segiteri ya Rwabidege muri Paruwasi ya Mwezi, Komini ya Karengera, Perefegitura ya Cyangugu.

Yahawe ubupadiri mu 1984 ubwo yari afite imyaka 29 y’amavuko. Akaba yari afite impano yo gusengera abarwayi bagakira, ndetse yateguraga ibiterane bigari bihuza abantu benshi bamwe bagatanga ubuhamya ko bari bafite indwara zananiranye ariko bakaba bakize.

Ingabire yo gukiza abarwayi yatangiye kuyibona mu 1987, ubwo yajyaga asengera abantu, nyuma y’iminsi bagatanga ubuhamya ko bakize.

Padiri Rugirangoga Ubald yamenyekanye cyane kubera ibikorwa by’isanamitima n’ibindi byiganjemo ibyo gusengera abarwayi bagakira. Yitabye Imana tariki 7 Mutarama 2021, aguhe muri Leta Zunze Ubumwe za Amerika aho yari amaze amezi atandatu arwariye.

Mu mwaka wa 2015 Padiri Ubald yagizwe Umurinzi w’Igihango kubera uruhare yagize mu gutangiza gahunda y’Ubumwe n’Ubwiyunge muri Paruwasi ya Mushaka.