Myr Edouard yanyomoje ibyatangajwe kuri Sinodi ko yaba irimo kwiga uko abagore baba abapadiri, abapadiri bagashaka n'abatinganyi bagahabwa umugisha.

Muri iki kiganiro, Myr Edouard Sinayobye, Umwepiskopi wa Cyangugu ari na we uhagarariye u Rwanda muri Sinodi, yasobanuye uko Sinodi irimo kugenda, by'umwihariko agira icyo avuga ku byatangajwe na bimwe mu binyamakuru kuri iyi Sinodi, bivuga ko mu byo irimo kwiga haba harimo guha abagore ubupadiri, abapadiri bagashaka ndetse bamwe banavuga ko irimo no kwiga uko abatinganyi bahabwa umugisha.

Myr Edouard yahakanye ibi byose, avuga ko ibi bitigeze binavugwaho kuko bitari no mu byo Sinodi irimo kwiga.

Yagize ati"Kuvuga ngo abagore babe abapadiri; Abapadiri bashake abagore; ngo ababana bahuje ibitsina ngo Kiliziya irabemeye ngo ibahaye isezerano ryo gushyingirwa...ibyo rwose ntaho bihuriye, ntabirimo mu byo twiga. Ntabyigeze bivugwa na gato."

Yakomeje ahumuriza abakristu avuga ko uretse kuba ibi bitangazwa bitaravuzwe, na Sinodi ubwayo itagamije gufata ibyemezo.

Ati"Iyi Sinodi ntabwo ari ifata ibyemezo ubungubu. Iyi Sesiyo ya mbere, ni sesiyo yo gushishoza ku byavuzwe. Ntabwo rero ari sesiyo yo gutangaza amabwiriza mashya.Abakristu bashyire umutima hamwe. Ntabwo duteraniye gufata ibyemezo ngo Papa atangaze amabwiriza mashya."

Myr Edouard yaboneyeho kwibutsa abakristu ko Kiliziya Gatolika idahubuka kandi ko ifite umurongo uhamye w'imikorere, abasaba kwima amatwi abifashisha ibitangazamakuru bakayivugaho ibidahuye n'ukuri.

Ati "Abakristu nibahumure, bihangayika, bikwakira amagambo nk'ayo ngayo. Kiliziya yacu ifite umurongo kandi usobanutse. Buri wese abona ko ufututse neza. Ntabwo Kiliziya ihubukira ibintu. Umurongo ikoreramo twese turawuzi, ntabwo ikorera mu binyamakuru ngo itangaze ibintu. Hari inzira za Kiliziya. Iyo hagize igitangazwa kirebana n'ukwemera ntabwo bitangazwa mu binyamakuru gutyo bifite inzira binyuramo."

Yakomeje ati"Icyo nakwifuriza buri wese, ni ukwirida ibivugwa cyane cyane n'ibinyamakuru bitari ibya kiliziya. Abantu batangaza amakuru bashatse; Ni uburenganzira bwabo, ariko twebwe abakristu tugomba gushishoza. Ibivuzwe byose n'ibitangazamakuru nk'ibyo twumva muri iyi minsi bivugwa, abakristu ntibakabitege amatwi. Tuzajya tubaha amakuru yizewe tuyanyuze ku bitangazamakuru Kiliziya yashyizeho. Nabasaba rero kudakurikira ibivugwa byose hanze ntabwo biba ari uko bihuye n'ukuri."

Ibi Myr Edouard abitangaje mu gihe Sinodi igeze ku munsi wa 12. Akaba yagaragaje ko ibirimo gukorwa birimo gukorwa mu muhezo usesuye ndetse ko umwanya munini muri iyi Sinodi uhabwa Isengesho ibintu abona ko ari isomo rikomeye mu mikorere ya Kiliziya.

Yaboneyeho gusaba abakristu gukomeza guherekeresha Sinodi isengesho, avuga ko aho ari azi neza ko nabo bahari kandi bakomeje urugendo hamwe na Kiliziya yose.