Myr Visenti yasabye Abakristu kudacibwa intege n'ibibazo bikomeje kubangamira ubutumwa birimo n'ifungwa rya kiliziya

Mu nyigisho yagejeje ku bakristu, Myr Visenti yababwiye ko nta gikwiye kubatera ubwoba ngo kibabuze kurangiza ubutumwa Kristu yabasigiye muri Kiliziya.

Ati"Bakristu nimwibumbire kuri Kristu. Ntihazagire ababashukisha za nyigisho z'ubuhendanyi. Imyumvire n'imikorere y'ab'iyi si. Mu bigeragezo duhura na byo, mujye mukomezwa n'uko turi kumwe na Yezu watsinze. Yezu ni umugabo udahangarwa. Inabi ntishobora kugira Ijambo rya nyuma. Ukuri, urukundo n'ineza amaherezo biratsinda."

Myr Visenti yibukije Abakristu ko ubutumwa bw'Abakristu bugengwa na Yezu wenyine kandi ari we ubuherekeza bityo akaba ntawe ukwiye kubyivangamo.

Ati"Umwami wacu Yezu aho amariye kuzuka, ni we wahaye Kiliziya ubutumwa. Dufite rero ubutumwa duhoza muri Kiliziya ntabwo twitumirije. Turi intumwa za Yezu kandi biduteye ishema. Umwana w'Imana wigize umuntu, wapfuye akazuka ni we udutuma, uwabyivangamo yaba arengera. Ubutumwa bwa Yezu burasobanutse. Nimugende mwigishe amahanga yose mubabatize ku izina ry'Imana Data na Mwana na Roho Mutagatifu, mubatoze gukurikiza ibyo nababwiye."

Myr Visenti avuga ko abakristu badakwiye kugira ubwoba kuko bahagarikiwe na Yezu ufite imbaraga zo kubatsindira ibigeragez bahura na byo mu butumwa yabahaye.

Ati"Dufite umwishingizi Nyakuri wizewe kandi ukomeye. Umunyarwanda yaravuze ngo Uhagarariwe n'ingwe aravoma. Abakristu twemera ko twe n'Imana turi kumwe, nta cyaduhungabanya, nta cyadukura umutima. Twebwe hamwe na Pawulo Mutagatifu turagira tuti ni iki cyadutandukanya n'urukundo rwa Kristu ibyago se, agahinda se, ibitotezo se, inzara se, ubukene se, imitego se cyangwa se inkota. Nyamara muri ibyo byose turatsinda kakahava tubikesha uwadukunze. Tubivuge tubisubiremo rero, nta na kimwe kizashobora kudutandukanya n'urukundo rw'Imana idukunda muri Yezu Kristu umwami wacu."

Agaruka ku bibazo byaranze umwaka w'ubutumwa wa 2024/2025, Myr Visenti yagarutse ku kibazo cy'ifungwa rya kiliziya, kikinakomeje kubuza benshi guhura na Yezu muri kiliziya. Yavuze ko byabangamiye ubutumwa ariko bitabuhagaritse ndetse bikaba bitaranabujije Diyosezi gukomeza kujya mbere.

Ati"Umwaka dushoje waranzwe n'imbogamizi zituruka ku kuba hari henshi Kiliziya zigifunze, abakristu bakaba badashobora guhurira hamwe ngo basenge. Abandi bakaba bakora ingendo ndende cyane ab'intege nke bo bakaba bamaze iminsi myinshi bibera mu rugo. Ibyo byadukomye mu nkokora ariko ntibyaduhagaritse mu rugendo rwacu rwo kujya mbere twiyubaka nka Diyosezi."

Uyu mwaka mushya w'ubutumwa wa 2025/2026, muri Diyosezi ya Ruhengeri, Myr Visenti Harolimana, yatangaje ko uzibanda ku guha imbaraga imiryango remezo n'ubutumwa buyikorerwamo. Ukazagendera ku nsanganyamatsiko igira iti"Ikenurabushyo ryegereye abakristu: Ubuzima n'ubutumwa mu miryango remezo yacu".