NCDA yahuje abapadiri bashinzwe Iyogezabutumwa ry'abana

Iyi nama yanitabiriwe na Myr Jean Marie Vianney Twagirayezu, ushinzwe Iyogezabutumwa ry'Abana mu Nama y'Abepiskopi Gatolika mu Rwanda yagarutse ku mikoranire hagati ya Kiliziya na NCDA mu bikorwa byo guteza imbere no kurengera umwana.

Mu gutangiza iyi nama, Mme Ingabire Assumpta, Umuyobozi Mukuru wa NCDA, yashimye ubufatanye iki kigo gifitanye na Kiliziya Gatolika binyuze mu bikorwa bitandukanye birimo guteza imbere imiryango, kwita ku bana no kubarengera.

Avuga ko iyi nama yatekerejwe mu rwego rwo kurebera hamwe uko inshingano zireba impande zombi zakubahirizwa. Ati "Iyi nama ni umwanya mwiza wo kongera kurebera hamwe inshingano dufite ku bana no kurushaho kunoza ubufatanye."

Yakomeje avuga ko abapadiri bashinzwe iyogezabutumwa ry'abana bafite umwanya wihariye mu guhindura imyumvire y'abana, imiryango yabo ndetse no guteza imbere indangagaciro yo kubaha uburenganzira bwa buri mwana.

Abapadiri bashinzwe iyogezabutumwa ry'abana basobanuriwe imirongo migari y'ibyibandwaho mu guteza imbere imikurire, kurinda no kurengera umwana mu Rwanda, banagezwaho imirongo ngenderwaho mu gutegura ibikorwa bigenewe abana cyangwa byitabirwa n'abana.

Mu izina ry'Inama y'Abepiskopi, Myr Jean Marie Vianney, yashimiye NCDA uko ifatanya na Kiliziya avuga ko Kiliziya yiteguye kwitangira ibikorwa byo kurengera umwana mu rwego rwo kurera abana banogeye Imana na sosiyete.

Iyi nama ibaye nyuma y'aho kuwa 27 Ukuboza 2024, Kiliziya yahimbaje Yubile y'abana aho abana basaga ibihumbi bitanu bahuriye i Kibeho. Abepiskopi bongeye gushimangira uruhare rwa Kiliziya mu kurera neza umwana no kumurinda kugira ngo akurane umutima n'ubwenge anogere igihugu na Kiliziya.