“Ndera neza, nkure neza, nkore neza, Ni nde ubwirwa?” Padiri Jean Baptiste Twambajimana
Mu gusoza icyumweru cy’uburezi Gatolika ku rwego rwa Diyosezi ya Kabgayi kuri uyu wa Gatandatu tariki ya 09 Gicurasi 2026, Padiri Jean Baptiste Twambajimana, ushinzwe Uburezi Gatolika n’Imyigishirize y’Iyobokamana muri iyi Diyosezi, yagarutse ku nsanganyamatsiko y’uyu mwaka igira iti “Ndera neza, nkure neza, nkore neza”, asobanura abo ubu butumwa bugenewe.
Ati “ Ndera neza, nkure neza, nkore neza, ni nde ubwirwa? Ni njye, ni wowe, ni twe, ni mwe babyeyi, ni mwe barezi, ni twe twese. Kiliziya Gatolika itwibutsa ko uburere bwiza atari ukwita ku bwenge gusa, ni ubureba buri wese. Iyo buri wese yitaweho akiri muto nta kabuza akura neza ndetse bigatanga n’icyizere cy’imikorere ye izaba nta makemwa ejo hazaza.”
Padiri Twambajimana yakomeje yibutsa ababyeyi n’abarezi ko inshingano zo kurera no gutoza abana indangagaciro nziza ari umukoro uhuriweho, bityo ko nta ukwiriye kuwiharira cyangwa ngo awusigire abandi.
Ati “ Igihe cyose tubona aba bana haba mu rugo haba ku ishuri, tujye dutekereza tugeze kure twibuke ko icyo tubagomba kizagirira akamaro ibisekuru byinshi kandi ko ibyo tudatunganya cyangwa se ibyo twica nkana bizagira ingaruka kuri benshi mu gihe kiri imbere.”
Yasoje ashimira Musenyeri Alphonse Rutaganda wagize igitekerezo cyo gutangiza icyumweru cy’uburezi Gatolika mu Rwanda, ubwo yari ashinzwe Ibiro by’Uburezi Gatolika mu Nama y’Abepiskopi Gatolika mu Rwanda.
Icyumweru cy’uburezi Gatolika cyatangiye kwizihizwa mu mwaka wa 2008, kikaba kigamije gushimangira uruhare rw’uburezi bushingiye ku ndangagaciro za gikristu mu kubaka umuntu wuzuye n’umuryango nyarwanda ufite uburere n’ubumenyi.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
