Papa Fransisiko ababaye yasabye imbabazi ba kavukire bo muri Canada

Ku munsi wa kabiri w’uru ruzinduko, Papa Fransisiko yarukomereje ahitwa Maskwacis, ahahoze ishuri ryigwagamo na ba kavukire bo muri iki gihugu (Ermineskin Indian Residential School) ahagana mu 1880, bagategekwa n’abamisiyoneri gatolika ba mbere bageze muri iki gihugu kureka umuco gakondo, kureka imyemerere yabo n’indi migenzo, bakayoboka imyemerere mishya bari bazaniwe n’aba bamisiyoneri.

Abenshi muri aba ba kavukire biganjemo urubyiruko n’abana bato banze kureka ibyo iwabo birimo umuco wabo, ururimi rwabo, imyemerere yabo, ngo bayoboke uburyo bushya bw’abamisiyoneri, maze barakubitwa kugeza bahasize ubuzima.

Uko imyaka yagiye ishira ni na ko abafitanye isano n’abakomoka ku bishwe muri icyo gihe mu gihugu cya Canada bakomeje kugaragaza uko ibyo bikorwa byakorewe ba kavukire byagize ingaruka ku miryango yabo, bagasaba ko Kiliziya yakwerura ikagaragaza uruhare rwayo muri ibi bikorwa byahitanye bakavukire, ndetse ikanasaba imbabazi abo byakomerekeje. Ibi bakaba barabimwibukije ubwo bamwe muri aba ba kavukire bakoreye urugendo nyobokamana I Roma muri werurwe uyu mwaka.

Mu ijambo yagejeje ku bateraniye i Maskwacis, kamwe mu gace karimo ishuri ba kavukire bigiragamo ibyo iwabo, Papa Fransisiko yavuze ko ababajwe n’ibyo abamisiyoneri gatolika bakoreye abana ba ba kavukire mu mashuri yo muri Canada, bityo akaba abasabye imbabazi.

Papa Fransisiko yagize ati“Ndi hano kubwo intambwe iherutse guterwa na bamwe mu bavandimwe banyu bakoze urugendo nyobokamana, bakansaba ko nabasaba imbabazi. mbasabye imbabazi mbikuye ku mutima.”

Ati“Nciye bugufi ngo nsabe imbabazi kubwo icyaha abakristu bagendeye ku mitekerereze ya gikoloni bakarenganya ba kavukire b’aha hantu; Kiliziya isabye imbabazi Imana kubwo ibyaha abana bayo bakoze.”

Mu bana bagera ku 150.000 bigaga mu mashuri ya ba kavukire mu gihugu cya Canada; ababarirwa hagati y’i 4.100-6000 bahitanwe n’ impinduramatwara zakorwaga n’abamisiyoneri gatolika ba mbere bageze muri Canada,barwanyije bivuye inyuma uburyo bw’imyigire n’imigirire bishingiye ku muco gakondo bari bahasanze, bagamije kuhatangiza uburyo bushya. Ishuri rya nyuma rigendera ku mahame ya gakondo muri iki gihugu rikaba ryarafunze imiryango mu 1996.

Papa Fransisiko avuga ko yashimishijwe no kuba abavandimwe b’aba ba kavukire barimo n’abafitanye isano n’abahasize ubuzima barateye intambwe ishimishije, bakamusanga kugira ngo bamusangize ku mutwaro ubaremereye ku mitima yabo y’uko Kiliziya yabarenganyije, akavuga ko na we yishimiye kuba yiyunze na bo.