Papa Fransisiko yakiriye Abepiskopi bo mu Rwanda bari mu ruzinduko i Roma

Uruzinduko rwa Visit Ad Limina 2023 rwitabiriwe n’Abepiskopi icyenda bayoboye diyosezi icyenda zo mu Rwanda aribo Nyiricyubahiro Antoni Karidinali Kambanda Arkiyepiskopi wa Kigali, Musenyeri Filipo Rukamba Umwepiskopi wa Butare, Musenyeri Smaragde Mbonyintege Umwepiskopi wa Kabgayi, Musenyereri Visenti Harolimana Umwepiskopi wa Ruhengeri, Musenyeri Anaclet Mwumvaneza Umwepiskopi wa Nyundo, Musenyeri Selesitini Hakizimana Umwepiskopi wa Gikongoro, Musenyeri Edouard Sinayobye Umwepiskopi wa Cyangugu, Musenyeri Papias Musengamana Umwepiskopi wa Byumba na Musenyeri Jean Marie Vianney Umwepiskopi watorewe kuyobora Diyosezi ya Kibungo uzimikwa ku wa 1 Mata 2023 i Kibungo. Bari kumwe kandi na Padiri Martin Nizigiyimana, Umunyamabanga Mukuru w'Inama y' Abepiskopi Gatolika mu Rwanda

Nk’uko Nyiricyubahiro Antoni Karidinali Kambanda Arkiyepiskopi wa Kigali akaba na Perezida w’Inama y’Abepiskopi Gatolika bo mu Rwanda yabitangarije Kinyamateka mbere y’uru ruzinduko , Visit Ad Limina ni uruzinduko Abepiskopi Gatolika bo mu gihugu runaka bagirira i Roma incuro imwe mu myaka itanu; bagahura n’Umushumba wa Kiliziya Gatolika ku isi, bakaganira ku buzima bwa Kiliziya Gatolika mu gihugu cyabo, bakamugezaho uko Kiliziya ihagaze, ingorane igenda ihura nazo n’ingamba bafata kugira ngo izo ngorane zibonerwe ibisubizo.

Karidinali Kambanda avuga ko Abepiskopi Gatolika mu Rwanda bagiye muri uru rugendo bafite byinshi byiza Kiliziya Gatolika mu Rwanda yagezeho bagiye kugaragariza Papa Fransisiko, muribyo harimo abakristu biyongereye, abasaseridoti biyongereye, abiyeguriyimana biyongereye, ingo z’abakristu ziyongereye n’amaparuwasi yiyongereye hirya no hino mu madiyosezi.

Ni urugendo Abepiskopi bakoze mu gihe Kiliziya Gatolika mu Rwanda iri mu myiteguro ya Yubile y’imyaka 125 Ivanjili imaze igeze mu Rwanda, Kiliziya Gatolika mu Rwanda ikaba yararonse muri iyi myaka Ingabire nyinshi zinyuranye zishingiye ku kwemera. Ni nyuma kandi y’uko Kiliziya Gatolika mu Rwanda iherutse kwizihiza Yubile y’Imyaka 100 Abanyarwanda ba mbere bahawe Ingabire y’ubusaseridoti, n’imyaka ijana Abanyarwanda ba mbere biyeguriye Imana byose bifatwa nk’imbuto z’Ivanjili imaze imyaka hafi 125 igeze mu Rwanda.