Papa Fransisiko yatangije ihuriro mpuzamahanga rya 10 ry'ingo z'abashakanye rizamara iminsi ine

Iri huriro ryatangiye none, ryaranzwe no kwakira abaryitabiriye byabereye mu nzu mberabyombi yitiriwe Paul VI, hakomeza igitaramo cyaranzwe n'indirimbo n'ubuhamya butandukanye bw'Ingo z'abashakanye, mbere yo kwakira Ubutumwa bwa Papa Fransisiko butangiza ku mugaragaro iri huriro.

Mu butumwa Papa yageneye igikorwa cyo gutangiza iri huriro, ahereye ku mugani w'umunyasamariya w'Impuhwe, yagarutse ku magambo atatu ari yo: Kwegera, kwitaho no kugirira impuhwe. Aya magambo Papa avuga ko ari yo ashingiyeho ubuzima bw'ingo z'abashakanye, kuko ari yo aziha kubaho no guhaguruka nyuma y'ingorane z'urudaca zidahwema guhura na zo.

Agendeye ku buhamya bw'ingorane zikomeje kugariza imiryango yagize ati "Diyosezi zacu na paruwasi zikwiye kuba izo kwakira abantu mu ngorane zabo. Dukwiye kurwanya ingeso yo kuba nyamwigendaho. Imiryango ikamenya gufashanya. Ntitwihagije. Ni yo mpamvu Imana yaremye urukundo rw'umugabo n'umugore. Ni impano ikomeye y'Imana, itwibutsa urukundo rwayo ruhoraho kandi rudacogora". Papa avuga ko ugushyingirwa bidakwiye kuba ibyo kurangiza umuhango cyangwa gukora ibirori. Umuntu agakora ubukwe kuko yifuza kubakira ubuzima bwe ku Mana no kubaho atari wenyine.

Papa kandi yasabye abashakanye kumenya kwakira umusaraba utabura mu buzima bw'ingo no kwiga kubabarirana. Agaruka ku bibazo bitandukanye bikomeje kugariza imiryango birimo:kubeshya, gucana inyuma, gukoresha nabi umutungo w'urugo, igitugu, gutandukana kw'abashakanye n'ibindi, yavuze ko ibi bibazo n'ubwo ntawe ukwiye kubirenza amaso kubera ingaruka zikomeye bigira ku miryango, abashakanye bakwiye kwiga kubabarira, bakiga kandi kubitura Imana no kwegera izindi ngo zihagaze neza ngo zibasindagize.

Ahereye ku mpunzi zavuye mu gihugu cya Ukerene zikakirwa mu bindi bihugu n'ubundi buhamya, Papa Fransisiko yashimangiye umugenzo mwiza wo kwakira abandi ukwiye kuranga imiryango. Avuga ko umuryango ushingiye ku kwakirana, umugabo akakira umugore, umugore n'umugabo bakakira abana. Imiryango ikakira abageze mu zabukuru n'abafite ubumuga. Mbese umuryango ukaba igicumbi cyo gushyigikirana. Ikaba igicumbi cy'ubumuntu no kubahana. Aho abantu bose bahurira nk'abavandimwe, n'ubwo hari byinshi bibatandukanya kubw'isi.

Papa yashimiye abitabiriye iri huriro abibutsa ko bafite inshingano zo kubera abandi urugero rwiza. Abasaba kandi gukomeza kumusabira. Iri huriro rizakomeza ku munsi w'ejo tariki 23 Kamena 2022, aho nyuma ya Misa izasomwa na Karidinali Farell, Umuyobozi wa Dikasiteri ishinzwe umuryango, hazakurikiraho ibiganiro bitandukanye, bizagaruka kuri Kiliziya yo mu rugo no kugendera hamwe; ubufatanye bw'ingo n'abapadiri mu gukorera Kiliziya; ubufatanye bw'urubyiruko n'abageze mu zabukuru mu gukorera Kiliziya; guherekeza Ingo zigishingwa, urukundo rw'abashakanye mu gihe cy'ibigeragezo; urubyaro.