Papa Fransisiko yitabiriye Inama y'Abayobozi bakuru b'Amadini ku isi irimo kubera muri Kazakisitani

Iyi nama ibaye ku nshuro ya karindwi yahuje abasaga 80 baturutse mu bihugu bigera kuri 50, ikaba yanitabiriwe na Papa Fransisiko uri mu ruzinduko mu gihugu cya Kazakisitani guhera kuri uyu wa 13 Nzeri 2022.

Mu ijambo Papa Fransisiko yagejeje ku bitabiriye iyi nama, yavuze ko iyi nama itanga icyizere cy'ikerekezo gishya gishingiye ku bwumvikane no kubana neza mu bwubahane, gushyikirana nta buryarya no kubahiriza amahame y'icyubahiro ntayegayezwa cya muntu. Iki cyerekezo buri wese akaba asabwa kukigira icye kuko ari byo byageza ku mahoro.

Papa Fransisiko yabwiye abayobozi bakuru b'amadini kumenya ko isi ibahanze amaso. Yagize ati "Nk'abayobozi bakuru b'amadini isi idutegerejeho urugero rwiza rw'abantu bafite umutima n'ubwenge buzima. Badutegerejeho iyobokamana ry'ukuri. Yibukije ko ubuhezanguni butokoza iyobokamana abasaba kurangwa n'umutima wa kimuntu.”

Ati“Buri wese muri twe akeneye gukira roho mbi....reka twitandukanye n'igishuko cyo kwiyumva nk'intungane kuruta abandi mbese tukumva ko ntacyo twakwigira kuri mugenzi wacu. Reka twitandukanye na ya myumvire y'ubuhezanguni n'iterabwoba itukisha Imana ikimakaza urwango, ubufana n'iterabwoba“.

Papa Fransisiko uri mu ruzinduko rw'iminsi itatu mu gihugu cya Kazakisitani byari biteganyijwe ko ahahurira na mugenzi we Kyrill uyobora idina ya Orthodoxe ifite icyicaro gikuru mu Burusiya, nyamara ntibyakunze kuko Kyrill atitabiriye iyi nama. Papa Fransisiko akaba yahuye n'abamuhagarariye muri iyi nama.