Papa Leo wa XIV yahamagariye Abanya-Korowasiya gukomeza kuba umusemburo w’amahoro mu isi yugarijwe n’intambara
Ibi yabigarutseho ku mugoroba wo kuri uyu wa 7 Ukwakira 2025, ubwo Papa Leo wa XIV yahuraga n'imbaga y'abakristu baturutse muri Korowasiya bari bateraniye ku mbuga ya Mutagatifu Petero i Roma bari baje mu rugendo Nyobokamana mu rwego rwo guhimbaza umwaka mutagatifu wa yubile.
Abagera ku bihumbi 10 nibo bitabiriye uru rugendo baturutse hirya no hino muri Korowasiya. Mbere y’igitambo cya Misa cyayobowe na Arkiyepiskopi wa Zagreb, Dražen Kutleša, afatanyije n’abandi b’episkopi n’abapadiri, Papa Leo wa XIV yabagejejeho ijambo ryuzuye impanuro, ishimwe, n’ihumure.
Yagize ati “Umuco w’ukwemera mwahawe n’abasokuru ni ubutunzi mukwiye kurinda"
Papa yagaragaje ko uru rugendo ari ikimenyetso cy’ubuzima bukiri buzima bw’ukwemera kw’Abanya-Korowasiya, abashimira uko bagiye bagumana ukwemera kwa Gikristu mu bihe bikomeye by’amateka yabo, kandi bagakomeza kwiyumva mu bumwe na Kiliziya no ku mushumba wayo, Umusimbura wa Mutagatifu Petero.
“Umuco mwiza mwahawe n’abasokuruza banyu ni nk’umutungo w’agaciro kadasanzwe. Mukwiye kuwurinda neza, ariko kandi mukawusigasira , mwiteguye kumva no kwakira ibyo Roho Mutagatifu ababwira muri iki gihe,”
Papa Leo yashimye by’umwihariko uburyo Abanya-Korowasiya bagaragaza ukwemera mu buzima bwa buri munsi, binyuze mu miryango yabo, mu makoraniro ya paruwasi, no mu miryango ya agisiyo Gatolika babarizwamo.
Mu ijambo rye Papa yagaragaje ko nubwo benshi mu Banya-Korowasiya baba hirya no hino ku isi kubera impamvu zitandukanye—nk’akazi, amasomo cyangwa ubundi buzima—bakwiye gukomeza gufata Yezu Kirisitu nk’Umushumba ubayobora.
“Ndabasaba ko muhora mwitegereza Yezu, Umushumba Mwiza. Mwemere kuyoborwa n’urukundo rwe n’ineza ye. Kandi mwibuke ko ukwemera gukura kandi gukomera iyo gusangiwe n’abandi.”
Yaboneyeho gusaba ababyeyi n’abakuru gukomeza gusangira n’abato indangagaciro za Gikristu, bityo bagasiga umurage mwiza uzakomeza kubaka igihugu cyabo n’isi muri rusange.
“Mwigishe abana banyu n’abato kwiyumvamo urukundo rwa Kristu no gukunda Kiliziya. Mube umusemburo w’amahoro, ibyiza n’icyizere mu isi yacitsemo ibice, yuzuye urugomo n’intambara—ibintu namwe mu mateka yanyu mwabayemo.”
Mu gusoza, Papa Leo wa XIV yahaye umugisha abari bateraniye ku Rubuga rwa Mutagatifu Petero, anatura Abanya-Korowasiya Bikira Mariya,(Umuvugizi w’ukuri wa Korowasiya), amusaba gukomeza kubarinda no kubayobora mu rugendo rw’ubuzima bwabo bwa buri munsi
Ibitekerezo (0)
- Nta gitekerezo kirahaba. Ba uwa mbere utanga igitekerezo.
