Sinodi muri Diyosezi ya Nyundo ntiyatunguye abakristu
Tariki 29 Kamena 2022, Diyosezi ya Nyundo yasoje ikiciro cya mbere cya Sinodi y'Abepiskopi, cyakorewe ku rwego rw'amadiyosezi. Mu nama isoza iki cyiciro, Komisiyo ya Sinodi muri iyi diyosezi, yamuritse urugendo rwakozwe mu gushyira mu bikorwa iyi Sinodi, n'umusaruro wavuye mu biganiro by'abakristu mu nzego zose zigize iyi Diyosezi.
Nk'uko twabitangarijwe na Padiri Antoine de Padoue, wari ushinzwe guhuza ibikorwa bya Sinodi muri diyosezi ya Nyundo, Sinodi yatangijwe tariki 17 Ukwakira 2021. Nyuma hakozwe inama ebyiri ku rwego rwa diyosezi harimo imwe yari igamije kurushaho kumva Sinodi icyo ari cyo. Mu rwego rwo gufasha kandi abakristu kumenya icyo basabwa gukora, hakozwe Inyandiko yifashishijwe mu gusobanurira abakristu Sinodi bahabwa n'ibibazo bazasuzumira hamwe.Nyuma hagiye hakorwa izindi nama zo Kurebera hamwe uko Sinodi irimo kugenda. Ibisubizo byo mu maparuwasi bimaze kwegeranywa itsinda rya diyosezi rishinzwe sinodi ryahuje Ibisubizo bivamo Inyandiko yamurikiwe inzego zitandukanye zishinzwe Iyogezabutumwa muri diyosezi tariki 29 Kamena 2022, itangwaho n'ibitekerezo mbere y'uko yoherezwa ku Biro by'Inama y'Abepiskopi ikazanahabwa abakristu.
Nk'uko akomeza abisobanura, mu rwego rwo gukurikirana ibikorwa bya Sinodi, uretse Komisiyo ya diyosezi hanifashishijwe komisiyo ya Sinodi iyi diyosezi isanzwe ifite kuko atari ubwa mbere abakristu bakoze Sinodi, dore ko n'umwaka wa 2021 iyi diyosezi yahimbaje isabukuru y'imyaka 20 ya Sinodi idasanzwe ya diyosezi yo mu mwaka wa 2000, yari Ifite intego igira iti:Ubukristu butubyarire ubuvandimwe nyabwo.
Mu gusubiza ibibazo byanyuze mu miryango remezo, imiryango y'Agisiyo Gatolika, Amakoraniro y abasenga, ibigo by'amashuri n'andi matsinda yihariye bitewe n'ibibazo byihariye mu iyogezabutumwa rya buri paruwasi. Abapadiri nabo bagize umwanya wo kuganira haba mu maduwayene ndetse no mu nama ibahuza ku rwego rwa Diyosezi.
Padiri Antoine de Padoue avuga ko muri rusange abakristu bagize igihe gihagije cyo kuganira kandi ko ntacyabatonze mu migendekere ya Sinodi kuko basanzwe bayimenyereye. Avuga kandi ko ibibazo byatanzwe abakristu babyakiriye neza kandi ko bazakomeza kubicengera mu rwego rwo kubyubakiraho ivugururwa ry'imigendekere y'Iyogezabutumwa rikenewe.
Nyuma y'Inama yo gusoza by'agateganyo imirimo ya Sinodi muri Diyosezi ya Nyundo hateganyijwe ibirori byo gusoza ku mugaragaro iyi Sinodi bizabera muri Paruwasi Kongo Nili tariki 15 Kanama 2022. Uretse urugendo Nyobokamana rusanzwe ruhakorerwa, buri paruwasi ikaza ihagarariwe kugira ngo habeho gusoreza hamwe imirimo y'icyiciro cya mbere cya Sinodi y'Abepiskopi muri iyi Diyosezi.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
