“Umuseminari agira ikimuranga harimo no gutegura neza ibiruhuko,” myr Jean Bosco Ntagungira.

Myr Jean Bosco Ntagungira umwepisikopi wa Diyosezi ya Butare ari nawe watuye igitambo cya misa mu iseminari nto ya Karubanda Virgo Fidelis, mu butumwa bwe yabwiye abaseminari bato n'ababyeyi babo ko kwitwa izina ry’abaseminari bidahabwa buri wese kuko rigaragaza ubudasa. Ati” Izina ry’abaseminari ntabwo rihabwa buri wese, mugomba kurangwa n'umwihariko, mugiye kujya mu biruhuko, ni iki wumva kizakuranga kinyuranye n'icyabandi, wamaze gukora uko gahunda zawe zizakurikirana? Babyeyi mufashe abana banyu gutegura ibiruhuko bajemo mubakorere gahunda y'ibiruhuko nabo babereke iyabo kugira ngo bayigendereho.

Myr yasabye ababyeyi kuba maso bagafasha abana mu biruhuko kandi bakabaha gahunda bagenderaho kugira abana batazajya baryama bakabyuka bajya kurya ntacyo bakoze. Ati”Abana banyu baje mu kiruhuko, ni baruhuke nibyo ariko ntibagakangurwe n'umwuka w'ibiryo ahubwo mubahe gahunda bagomba kuzajya bagenderaho.”

''Mbifurije ibiruhuko byiza, muzagire ikibaranga cy'umwihariko nk'abaseminari, umwaka mushya muhire, muzawurye ntuzabarye.”

Kwizihiza umunsi mukuru wa Bikiramariya utasamanywe icyaha umurinzi wa Seminar into ya Karubanda Vigo Fidelis. Byahuriranye no guhimbaza yubile y'imyaka 25 y'ubusaserdoti bwa Padiri Kanamugire Flodouard umurezi muri iyi Seminari.

Myr Jean Bosco yifurije Padiri Kanamugire Flodouard yubile nziza no gukomeza kubere urugero barumuna be kuko yaberetse ko bishoboka.

Mu nyigisho ye, Myr Jean Bosco Ntagungira yagarutse ku munsi Mukuru wa Bikira Mariya Utasamanywe icyaha waragijwe Seminari nto ya Karubanda. Yavuze ko Bikira Mariya Utasamanywe icyaha ari rimwe mu mahame 4 y'ukwemera areba Umubyeyi Bikira Mariya.

Ati'' Ihame rya Mbere ni uko Bikira Mariya ari nyiba w'Imana, irya Kabiri ni uko Bikira Mariya ari isugi n'Umubikira iteka ryose, irya Gatatu ni uko yajyanywe mu ijuru n'umubiri we na Roho ye icya nyuma ni uko Bikira Mariya ari Utarasamanywe icyaha''. Igihe avutse Nyagasani yamurinze icyaha cy'inkomoko cyokamye bene muntu.

Myr Jean Bosco yasabye abaseminari kwibuka gusaba imbabazi igihe bakosheje. Ati ''Icyaha kitwambika ubusa, kidushyira ku karubanda kikadushyira kure y'Imana, babyeyi namwe bana mujye mukirinda. Gusa Imana ntabwo icika intege kuko yaje gushakashaka na Adamu na Eva n'ubwo bari bakoze icyaha iti muri hehe? Imana iteka ihora idushaka ikabaririza igahamagara. Tureke kwihisha, baseminari mumenye ko Imana yaje ibashaka ikabakura i wanyu kugira murusheho kuzibuka no gutega amatwi, mwimwihisha rero ahubwo vuga uti ndi hano.

Ntimwumve ko igihe kitaragera, igihe ni iki, Umubyeyi Bikira Mariya atubere urugero rwo kumenya guhitamo igikwiye. Niba Imana yaraguhamagaye wishaka gucengacenga ahubwo emera cyangwa uhakane kugira ngo bitazatuma ubeshya ubuzima bwawe bwose mujye mumenya kuvugisha ukuri.

Umuyobozi wa Seminari nto ya Karubanda Virgo Fidelis Padiri Jean de Dieu Habanabashaka, yavuze ko bishimiye guhimbaza umunsi mukuru w'ishuri rimaze imyaka 62 rishinzwe. Ati'' Dufite ibyishimo byo guhimbaza yubile y'imyaka 25 y'ubusaserdoti bwa Padiri Kanamugire Flodouard umurezi muri Seminari yacu akaba ari naho yarerewe, turashimira Umwepiskopi wacu Myr Ntagungira Jean Bosco waje kuduturira Igitambo cya Misa.''

Yavuze ko kandi mu baseminari bafite, bifitemo impano zitandukanye kandi bishimira zirimo ibijyanye no kubyina Kinyarwanda, gukina imikino inyuranye nka Volleyball, Basketball n’indi, kuvuga amazina y’inka n’ibindi. Avuga ko kandi bahagaze neza mu bijyanye n'amasomo no muri izo mpano nkuko biri mu ndirimbo yubahiriza ishuri ryabo aho bagira bati'' Seminari Isonga yayisumbuye.''

Ku bijyanye n’imitsindire Seminar into ya Karubanda ihagaze neza. Ati'' Mu gutsinda muri uyu mwaka twatsinze neza aho twaje ku mwanya wa kabiri mu mashuri yigisha Science no ku mwanya wa kabiri mu karere ka Huye, gusa twifuza ko twarushaho kuba isonga yayisumbuye.

Umwe mu baseminari barererwa muri Virgo Fidelis Karubanda yashimiye Umwepiskopi wa Diyosezi ya Butare Myr Jean Bosco Ntagungira wifatanyije nabo kuri uyu munsi, ababyeyi na bakuru babo babahora hafi, ashimira ubufatanye n'ababyeyi babo n'ubuyobozi bwabo bwabafashije kubona isomero ry'ibitabo bihagije kuko bizabafasha mu myigire yabo.

Claudine Karera Umwe mu babyeyi bahagarariye abandi barerera mu iseminari nto ya Karubanda Virgo Fidelis, yashimiye Ubuyobozi bw'ishuri bubafashiriza abana babo bakava ku rwego rumwe bajya ku rundi kandi ko bishimiye kwakira Myr Jean Bosco Ntagungira mu rugo rw'abana babo. Avuga ko hari byinshi byagezweho bafatanyije n'ubuyobozi bw'ishuri, harimo imishinga yo gusana bimwe mu bikorwaremezo, n'ibindi bateganya kuzakora mu myaka iri imbere baboneraho guha impano Myr Ntagungira y’ikaze no kumushimira.

Umujyanama w'Umuyobozi w'Akarere ka Huye Kagabo Joseph, mu izina ry'ubuyobozi bw'akarere yavuze ko inzozi abaseminari bafite ari nziza kandi bagifite urugendo. Avuga kandi ko abarimu babafata nk'abagaciro gakomeye kandi babubaha bakabashimira iteka n'umurimo ukomeye bakora, ashimira uruhare rwa Kiliziya Gatolika mu burezi.

Mu birori byo kwizihiza umunsi mukuru wa Bikiramaiya utasamanywe icyaha, umurinzi wa Seminar into ya Karubanda. Ubuyobozi bwa Seminari nto ya Karubanda kandi bwatanze ibihembo ku baseminari batsinze neza mu mezi atatu ashize muri iki gihembwe cya mbere cy'umwaka wa 2024, abatsinze neza mu bizamini bya leta bakabyuzuza, abarezi batsindishije neza kuko aribo babicyesha ndetse bashimira n’abahoze biga mu iseminari nto ya Karubanda bibumbiye mu muryango ASEVIF kubwo guhora hafi iri shuri.