Urubyiruko rwa Kigali rwasabwe kutiheba rukarangwa no kwizera.

Ni urugendo ngaruka mwaka rutegurwa n'Umwepiskopi wa Arikidiyosezi ya Kigali Antoine Karidinali Kambanda, aho kuri uyu munsi Igitambo cya Misa cyayobowe n'Igisonga cye Myr Kazimiri Uwumukiza.

Mbere y'Igitambo cya Misa urubyiruko rwahawe inyigisho igira iti "Nimwishimire amizero mufite muri Kristu."

Muri iyi nyigisho urubyiruko rwashishikarijwe kwigiramo amizero, rukikuramo icyo ari cyo cyose cyarukura umutima ngo usange rwarihebye ruvuga ngo nta myaka ijana.

Padiri Gatete watanze iyi nyigisho yagize ati "Iyi si tuzayisiga kandi twifuza ko iherezo ryacu ryaba ryiza. Yezu Kristu ni we uduha ukwizera kandi amizero yacu akamushingiraho. Umujeni utifitemo ibyishimo ni wawundi uvuga ngo nta myaka ijana. Birakwiye ko ibyishimo tumuvomamo bituma twumva ko dufite amizero tumukeneyeho."

Padiri Gatete yakomeje abwira urubyiruko ko n'ubwo umuntu yahura n'ingorana zidakwiye kumuherana cyangwa ngo azigire akamenyero k'imibereho ye. Arusaba kubakira ubuzima ku byishimo n'amizero bituruka kuri Roho Mutagatifu.

Yakomeje abasaba ko urugendo bakoreye i Kibeho rwatuma barushaho kwishima mu mibereho yabo. Ati "Dusabe umubyeyi Bikira Mariya aduhindure, tubeho kandi tunezerewe."

Myr Kazimiri Uwumukiza, Igisonga cy'umwepiskopi wa Arikidiyosezi ya Kigali yasabye urubyiruko kudashakira ibyishimo mu buzima bworoshye ahubwo bagatinyuka no guhangana n'ibibagora barangwa n'ukwizera.

Ati "Bikira Mariya atwigisha kudacika intege iyo tugamije ikintu kiza.Turebere no kuri Yezu wemeye kubabara agapfa agira ngo arengere ubuzima bwacu. Twemerere Bikira Mariya atubere urugero, tubashe guhangana n'ibyo duhura na byo byose."

Myr Casimir yakomeje abwira urubyiruko ko ruri mu myaka myiza yuje inzozi nyinshi. Arusaba kuyikoresha neza barangwa n'ubutwari no kudacogora kandi barinda ubuzima bwabo icyabwanduza cyose.

Padiri Thaddée NDAYISHIMIYE, Umuyobozi wa Komisiyo ishinzwe ikenurabushyo ry'urubyiruko yavuze ko n'ubwo urubyiruko ruhura n'ibibazo binyuranye birimo ubukene n'ibindi umuti w'ibi byose ari ukwemera, isengesho no kumurikirwa n'amateka meza.

Yibukije urubyiruko kwakira neza umusaraba wa Forumu ukomeje kugera hirya no hino mu maparuwasi ya Kigali, kugira ngo uzabafashe kurangamira Kristu we mizero y'urubyiruko.

Yagarutse no ku butumwa Abepiskopi bageneye urubyiruko mu ibaruwa itangiza Yubile aho bibukije ko urubyiruko ari amizero y'igihugu na Kiliziya. Asaba urubyiruko ko Yubile yarufasha kwigarurira icyizere kugira ngo rubashe kubaho neza.

Urugendo rw'uyu mwaka rukaba rwitabiriwe n'abasaga 4500 baturutse mu maparuwasi 42 y'Arikidiyosezi ya Kigali.