Vatikani yashyize ahagaragara ikirangantego cy'uruzinduko rwa Papa mu gihugu cya Kazakisitani

Intego y'uru ruzinduko azaba ari "Intumwa y'amahoro n'ubumwe". Mu kirangantego cyashyize ahagaragara kuri uyu wa kabiri, hagaragaramo inuma itwaye ishami ry'umuzeti. Iyi numa kandi amababa yayo ashushanyijwe n'ibiganza bibiri bisa n'ibiyiteruye bikaba bisobanura intumwa y'amahoro n'ubumwe.

Muri iyi numa kandi hashushanyijemo umutima uvuga urukundo soko y'ubufatanye, n'ubwumvikane mu bantu. Ishami ry'umuzeti na ryo ririhariye rikaba rishushanyije ikibabi gisanzwe gikoreshwa mu mitako mu gihugu cya Kazakisitani.

Iyi numa igaragara mu ibara ry'ubururu bweruruka akaba ari ibara rimenyerewe ku nzu z'abo mu gihugu cya Kazakisitani. Muri iryo bara kandi uretse inuma, hashushanyijemo umusaraba w'umuhondo n'ubururu. Aya mabara agaragara cyane muri iki kirango akaba ari n'amabara y'idarapo ry'igihugu cya Kazakisitani. Ibara ry'umuhondo kandi rigaragara mu idarapo rya Vatikani. Mu gihe ibara ry'icyatsi rishushanyije umutima rivuga amizero.

Intego y'uru rugendo "Intumwa y'amahoro n'ubumwe", yanditse mu ndimi ebyiri aho hejuru yanditse mu rurima rw'igihugu cya Kazakisitani mu gihe hasi yanditse mu rurimi rw'Ikirusiya.