Ababikira 9 bo mu muryango w’intumwa za Yezu Mariya na Yozefu bakoze amasezerano ya burundu.

Ni ibirori by’itabiriwe n’umukuru w’umuryango ku rwego rw’isi Mama Isabelle Agwado avuye mu gihugu cya Esipanye ari naho hari ikicaro cy’umuryango w’ababikira b'intumwa za Yezu Mariya na Yezefu. Abihayimana batandukanye, ababyeyi inshuti n’abavandimwe b’ababikira bakoze amasezerano ya burundu, baturutse muri Diyosezi zitandukanye Butare, Cyangugu, Nyundo, n’ahandi hatandukanye baje kubashyigikira mu munsi mukuru wabo.

Mu nyigisho ye Myr Balthazara Ntivuguruzwa umwepisikopi wa Kabgayi yavuze ko ingabire yo kwiyegurira Imana ari imwe mu ngabire zitatse kiliziya ya Yezu Kristu. Ashimira ababikira 9 bagiye gusezeranira Imana burundu ko bagiye kuba abayo ndetse n’umukuru wabo (Mère Génèrale) waje guhamya amasezerano yabo.

Myr Balthazar yabwiye abasezeranye burundo ko badakwiye kugira ubwoba kuko uwo Imana itoye imushoboza kandi ikamuha n’ibyangombwa byose kugira ngo asohoze ubutumwa yamugeneye.

Yagize ati” Mu mutima wanyu nihuzuremo Yego idasubira inyuma, ni murangwe no kwicisha bugufi, mwiratire muri Nyagasani kandi muhore mushimira Imana. Turabifuriza kuba abahora bumvira Imana aho muri hose. Ni muharanire ubudahemuka ku isezerano no ku muhamagaro w’ubutungane Nyagasani ahora abagezaho, Ni mube abizerimana igihe n’imburagihe.

Myr Balthazar yabwiye ababikira bakoze amasezerano ko Nyagasani yabatoye kandi ntacyo abaciye, ahubwo ari ukubera Ubuntu yabagiriye. Yagize ati “Ntabwo Imana yabatoye kuko muri abakobwa beza kurusha abandi mu midugudu y’iwanyu, ntabwo yabatoye kuko muri intungane, ni ku buntu n’impuhwe n’ubushake bwayo kuko ariyo ifitiye buri wese urugendo rw’ubuzima bwe ikaba ari nayo imugenera ubutumwa bw’ihariye ku muryango wayo.”

Umukuru w’umuryango w’intumwa za Yezu Mariya na Yozefu ( Mère Génèrale des Soeurs missionnaires de Jesus Marie et Joseph) ku isi, Mama Isabelle Agwado yashimiye ababikira 9 bakunze umuryango bakaba bakoze amasezerano ya burundu. Yavuze ko yishimiye uko yakiriwe mu Rwanda dore ko ari ku nshuro ye ya mbere ageze ku mugabane w’Afurika no mu gihugu cy’u Rwanda. Yashimiye Myr Balthazar umwepisikopi wa Diyosezi ya Kabgayi wamwakiranye urugwiro, akanamwakira mu izina ry’abandi bepisikopi bayobora Diyosezi iyi kominote y’ababikira b’intumwa za Yezu Mariya na Yozefu ibarizwamo hirya no hino mu Rwanda.

Mama Angeline Mukahaguma umukuru w’umuryango w’ababikira b’intumwa za Yezu Mariya na Yozefu mu Rwanda yavuze ko yishimiye ko abavandimwe babo bakoze amasezerano ya burundu bityo umuryango ukaba wungutse intumwa. Yakomeje avuga ko mu butumwa bwabo bahamagarirwa gusa na Yezu umunyampuhwe, barangwa no kwiyoroshya, kwicisha bugufi,no kugira urukundo rutagira umupaka . Yagize ati” Mu butumwa bwacu, duhamagarirwa kwita ku bababaye, abakene, abarwayi , abafite ntege nke, abasaza n’abakecuru bageze mu za bukuru bose nta mu paka kandi mu rukundo rwa Yezu umunyampuhwe, nk’uko intumwa zabigenzaga , tukabana nabo umunsi ku munsi.

Mama Marie Claire Uwiringiyimana wo muri Diyosezi ya Byumba paruwase ya Rwamiko umwe mu bakoze amasezerano ya burundu , mu izina rya bagenzi be yavuze ko ari umunsi w’ibyishimo kuri bo kuko inyota bagize kuva kera Nyagasani yabafashije bakaba bageze ku cyo bifuje. Yagize ati” Ntabwo umuntu abyuka ngo ahite akora amasezerano ya burundu, ni urugendo umuntu agenda akora, kuva kuri 22/08/2015 nibwo twageze muri kominote bwa mbere kugeza uyu munsi haciyemo imyaka myinshi. Amasezerano ya mbere twayakoze muri 2019 muri Diyosezi ya Butare dukomeza ubutumwa ariko twumva dushyize amizero muri Nyagasani kandi urukundo rwe ruduharanya, none uyu munsi twiyemeje kumwiyegurira burundu.”

Abakoze amasezerano ya burundu ni mama Devothe MUKESHIMANA, Mama Félicité MUJAWAMUNGU, Mama Sophie IMANISHIMWE, Mama Béatrice MUHORACYEYE, Mama Sylivie KABANYANA, Mama Monique UWAMARIYA, Mama Chantal MUJAWIMANA, Mama Marie Claire UWIRINGIYIMANA na Mama Donatha UWIRAGIYE.

Umuryango w’intumwa za Yezu Mariya na Yozefu wavukiye mu gihugu cya Esipanye mu 1939, ushingwa n’umubikira witwaga Mama Dolores Domingo. Wageze mu Rwanda mu 1970 I Kayenzi muri Diyosezi ya Kabgayi, wagiye ukura ugaba amashami muri 1972 wageze ku Nyundo, ababikira bahakurwa na jenoside yakorewe abatutsi 1994, wakomereje muri Diyosezi ya Butare mu 1999 hafungurwa urugo rw’irerero, muri 2018 bafunguye urundi rugo rubamo ababikira bari mu kiciro cyo gukurikirana amasomo, muri 2014 ababikira basubiye muri Diyosezi ya Nyundo bafungurayo urugo, muri 2023 bafunguye urundi rugo muri Diyosezi ya Cyangugu.

Mu butumwa bw'ababikira b’intumwa za Yezu Mariya na Yozefu bahamagarirwa gusa na Yezu umunyampuhwe, bitangira abakene, abarwayi no gusura abakuze, kwita ku mfubyi bafatanyije na paruwase baherereyemo ndetse n’ubundi butumwa kiliziya ibakeneyemo. Mu bindi bikorwa umuryango w’ababikira misiyoneri ba Yezu Mariya na Yozefu washinze ishuri ry’inshuke ryaragijwe mutagatifu Yozefu I Kayenzi , bakaba banakora mu bitaro bya Diyosezi. Kuri ubu uyu muryango ubarizwa ku migabane itatu Uburayi, Amerika na Afurika