Ababikira b’Abasmaldone bahimbaje Yubile y’imyaka ijana y’ukuvuka mu ijuru kwa Mutagatifu Filipo Smaldone

Ni ibirori byabimburiwe n’igitambo cya Misa cyatuwe na Arkiyepiskopi wa Kigali, Antoni Karidinali Kambanda.

Ibi birori kandi byitabiriwe na Myr Tadeyo Ntihinyurwa, Arkiyepiskopi wa Kigali uri mu kiruhuko cy’izabukuru hamwe n’abandi bihayimana mu byiciro bitandukanye.

Muri ibi birori kandi hanatanzwe amasakaramentu y’ibanze ku bana 23 babyiteguye. Aba bana bahawe abasakaramentu ni abasanzwe bafashirizwa n’uyu muryango mu kigo gitanga uburezi budaheza.

Mu butumwa bwe, Arkiyepiskopi wa Kigali, Antoni Karidinali Kambanda yifurije Yubile nziza uyu muryango washinzwe na Mutagatifu Filipo Smaldone ndetse aboneraho gushima uruhare rwa Mutagatifu Smaldone mu gufasha abafite ubumuga bwo kutumva no kutavuga kuba basingiza Imana.

Karidinali Kambanda yakomeje avuga ko Yubile ari iyo kugarukira Imana, gutsindagira urukundo no kugaruka mu muryango w’Imana ari nayo mpamvu y’ibyishimo bikomeye.

Yongeyeho ko Yubile ari igihe cyo gutekereza neza kuri ejo hazaza.

Ati “Yubile ni iyo kutwibutsa gutegura ejo hazaza ha Kiliziya n’Umuryango kandi tukabikorana ukwizera.”

Sr. Marie Claire Muyizere uhagarariye umuryango w’Abasaleziyani b’Umutima mutagatifu wa Yezu na Bikira Mariya muri Afurika yavuze ko ari ibyishimo bikomeye kuba bahimbaza Yubile y’Imyaka 100 uwabashinze amaze atabarutse.

Yagize ati "Kuri twe nk’abana be, ni iby’agaciro gakomeye kuko indi myaka ijana ntawe uzaba azi aho turi. Niyo mpamvu mvuga ko twagombye kuyihimbaza neza.”

Sr. Muyizere yavuze ko ibikorwa byaranze urugendo rwo kwizihiza Yubile y'imyaka ijana y'ukuvuka mu ijuru k'uwabashinze ariwe Mutagatifu Filipo Smaldone, byibanze ku kumenyekanisha Mutagatifu Smaldone cyane cyane ku bantu batari bamuzi kugira ngo bamenye ibyamuranze ndetse n’ibyamufashije kugira ngo abe akivugwa uyu munsi nk’umuntu ukiriho kandi amaze imyaka 100 apfuye.

Ati “Icyo twibanzeho ni ugushishikariza abantu kumva ko kugera ku butagatifu bishoboka, kandi umuntu akitagatifuriza mu bikorwa byoroshye nkuko Mutagatifu Smaldone yitagatifurije mu gufasha abana batumva ntibanavuge.”

Kuri Sr. Muyizere, Umurage wa Smaldone ni ugukomeza gukunda isengesho, kugira urukundo ndetse no gufasha nkuko byarangaga Smaldone.

Ati “Umubyeyi wacu Smaldone yadusigiye umurage wo kumva ko udashobora kurera utagira urukundo”

Sr.Muyizere yakomeje avuga ko intumbero y’umuryango ari ukurera abazakomeza ubutumwa n’umurage wa Mutagatifu Smaldone kugira ngo mu ma miliyoni y’imyaka ubwo butumwa buzabe bukiriho.

Ati “Tuzasiga umwera mwiza ku bihayimana baza badukurikiye kuko natwe twawusigiwe na Mutagatifu Smaldone.”

Uretse abihayimana kandi, uyu muryango ufite abalayiki bafatanya mu butumwa butandukanye.

Ibyiciro by’abalayiki bo muri uyu muryango ni abakuze, urubyiruko n’abakiri bato.

Sr. Muyizere yavuze ko icyo batoza ibyo byiciro by’abalayiki ari ukumenya Imana no kumva ko kuba umutagatifu bishoboka uhereye ku bintu bito bishoboka.

Inshamake ku buzima bwa Mutagatifu Filipo Smaldone

Filipo Smaldone, wavutse ari imfura mu bana barindwi, yavutse ku wa 27 Nyakanga 1848, avukira mu gihugu cy’Ubutaliyani, mu mujyi wa Napoli.

Ku myaka 14, Filipo yinjiye mu iseminari nto kugira ngo azabe umusaserdoti wa Diyosezi ya Napoli.

Aya masomo yayafatanyaga no gukora ubutumwa bunyuranye burimo kwigisha gatigisimu, gusura abarwayi n’ibindi.

Smaldoni yahawe ubusaserdoti ku wa 23 Nzeri 1871. Nyuma yo guhabwa ubusaserdoti yakomereje ubutumwa muri Diyosezi ya Napoli ari nako akomeza ibikorwa byo kwitangira abarwayi n’abakene.

Umunsi umwe, ubwo Padiri Filipo Smaldone yarimo yigisha gatigisimu mu kiliziya, yumvise urusaku rw’umwana wariraga cyane, yubuye amaso abona umubyeyi wari uteyeruye umwana, aramwegera amubaza impamvu umwana arira cyane, nuko ububyeyi asubizanya agahinda agira ati “Umwana wanjye ntiyumva ntanavuga!” nuko nyina ahita agenda.

Nyuma yo kubitekerezaho, gusenga no kugisha inama umujyanama we wa Roho, Padiri Smaldone yahisemo kwitangira abatumva ntibanavuge n’abandi bakene bari bagwiriye mu Butaliyani.

Icyo gihe abana batumva bari benshi, bakeneye urukundo, kwiga kandi bakeneye n’abarimu.

Icyo gihe, Padiri yimukiye mu majyepfo y’Ubutaliyani mu ntara ya LECCE kugira ngo atangize icyo gikorwa gishya.

Ku wa 25 Werurwe 1885 nibwo ababikira batatu bambere bambwitswe ndetse umuryango w’Ababikira b’Abasaleziyani b’Umutima mutagatifu wa Yezu uvuka utyo.

Ubuzima bwe bwose yabumaze i LECCE yita ku bana bafite ubumuga bwo kutumva no kutavuga.

Ku myaka 75, Padiri Smaldone yitabye Imana ku wa 4 Kamena 1923 kubera impamvu z’uburwayi.

Nyuma yo gutabaruka kwe, ababikira bakomeje igitekerezo yari yarahoranye cyo kuzaba umumisiyoneri no kuba ababyeyi b’abatumva ntibanavuge.

Ibi byatumye muri 1972 bafungura urugo rushya muri Brezil.

Mu mwaka wa 1987 bafunguye urundi rugo mu Rwanda (ku ntumwa ya Papa mu Rwanda) n’i Nyamata. (Ahari irerero ry’abifuzaga kwiyegurira Imana n’amashuri y’inshuke.)

Mu mwaka 1992 nibwo bafunguye ikigo cya Nyamirambo kigishirizwamo abana batumva ntibanavuge.

Muri 2017 bafunguye irerero rishya ry’abifuza kwiyegurira Imana rya Rilima.

Padiri Filipo Smaldone yashyizwe mu rwego rw’abahire ku ya 12 Gicurasi 2006 na Papa Pawulo wa II, mu gihe yagizwe umutagatifu ku wa 15 Ukwakira 2006 na Papa Benedigito wa XVI.

Tariki ya 15 Ukwakira 2023, nibwo Ababikira b’Abasaleziyane b’Umitima Mutagatifu wa Yezu na Bikira Mariya bazwi ku izina ry’Abasmaldone, bizihije ku isi hose mu bihugu bakoreramo ubutumwa, Yubile y’imyaka 100 Mutagatifu Filipo Smaldone wabashinze amaze avutse mu ijuru.

Uyu muryango ufite by’umwihariko ubutumwa bwo kwita ku bana bafite ubumuga bwo kutumva no kutavuga.