Abagize umuryango wa Kolping basabwe kubakira iterambere ku Isengesho

Igitambo cya misa cyatuwe na Padiri Nzeyimana Festus Omoniye W’umuryamgo wa Kolping akaba ari nawe ushinzwe Pastoral muri Diyosezi ya Ruhengeri, akaba yashishikarije abagize umuryango wa Kolping gukomera ku isengesho rijyana n’iterambere.

Yagize ati “Tugomba guhorana n’Imana nk’ipata n’urugi. Nta kanya na gato kagomba kubaho, ibitekerezo byacu tutabiyoboye ku Mana byose tubinyujije mu isengesho. Tugomba kandi no kwiga gutega amatwi Ijambo ry’Imana tukarigira iryacu, tukumva icyo Imana itubwira. Ni bwo na rya terambere ryifuzwa tuzarigeraho.“

Padiri Festus yabasabye kudatwarwa n’iby'isi ngo bibibagize Imana n'urukundo rwa Kivandimwe rukwiye kubaranga. Ati “Ntimutwarwe n’ibyisi mwaronse, mwungutse cyangwa se mwejeje ahubwo urukundo n’impuhwe mbere na mbere. Turifuza gukangurira abanyamuryango n’abawugana, guhagurukira kwiteza imbere kuri roho no ku mubiri,cyane cyane bakangukira isengesho, n‘imyitozo yo kwitagatifuza dushishikarizwa na Kiliziya nko kuzirikana Ijambo ry’Imana, isengesho, no guhabwa amasakaramentu."

Mujawamariya Dancille Umunyamabanga w’umuryango Kolping association mu Rwanda yavuze ko umuryango Kolping ukomeje gushyigikira ibikorwa bigamije iterambere ry'umubiri ariko utibagiwe n'iterambere rya Roho.

Dancile akomeza avuga ko ibi bikorwa byose bigamije gufasha abanyamuryango kwifasha kugira ngo bashobore gufasha abandi. Kolping ikagira umwihariko wo kwibanda ku isengesho riherekejwe n’ibikorwa by’iterambere ry’umubiri kugira ngo Roho nziza iture mu mubiri muzima. Abagize Kolping bibanda cyane ku iterambere kugira ngo isengesho ribafashe gushyigira ibikorwa byose by’umuryango bityo Isengesho rijyane n’ibikorwa mu buzima bwa buri munsi. Yashishikarije abantu gukora no kwiteza imbere kandi avuga ko Kolping igikeneye abandi ba Nyamuryango bakaba bifuza ko izagera mu paruwase zose mu Rwanda.

Mu bikorwa by'iterambere rya Roho Madamu Dancille yagarutse ku isengesho, gusura abarwayi n'ibindi bikorwa by’urukundo. Naho ku bikorwa by’iterambere ry'umubiri avuga ko Kolping yibanda ku gukora ibikorwa by’ubuhinzi n'ubworozi mu rwego rwo kurwanya ubukene n’inzara.

Mu buhamya bwa bamwe mu banyamuryango ba Kolping bavuga ko yabafashije guhindura imyumvire n’imikorere bitewe n’inyigisho n’amahugurwa yabagejejeho.

Bakundukize Jean Nepomscene wo muri Kolping family paruwasi ya Biruyi Diyosezi ya Nyundo yavuze ko amaze imyaka 13 akaba yarageze ku mpinduka mu iterambere kuko Kolping yasanze afite icyiciro cya A2 akaba yarageze ku cyiciro cya A0 abikesheje kujya muri Kolping.

Mukamurenzi Marie Jeanne nawe wo muri paruwasi ya Biruyi arashima umuryango wa Kolping wamwigishije gusenga no gukorwa. Avuga ko itungo yahawe na Kolping ryamufashije kwiteza imbere kandi akabasha no kurihira umwana we abikesheje itungo yahawe muri Kolping.

Kuri ubu Umuryango wa Kolping mu Rwanda ufite abanyamuryango bagera ku 6390 bakoze amasezerano, Babarizwa mu ngo 127 mu cyo bita Kolping family.

Abagera ku bihumbi 4071 baherekejwe n’abapadiri bagera kuri 25 ni bo bitabiriye urugendo nyobokamana I Kibeho harimo n’abahageze bwa mbere bishimiye kubona ibyiza bya Kibeho.

Ati”Harakabaho umuryango wa Kolping kuko udufasha gukomera ku isengesho, ukatwigisha urukundo no gukunda umurimo, binyuze muri Senga, Iga, Kora."

Kolping Rwanda Asociation ni umuryango mpuzamahanga w’abarayiki ugamije gusanisha ubuzima bwa kristu n’ubuzima bwa buri munsi no kuvugurura cyane cyane ubuzima bw’abantu kugira ngo bahinduke bashya nabo bahindure isi nshya. binyuze mu bikorwa byo gufasha abanyamuryango n’abandi batari abanyamuryango gushishikarira ibikorwa by’iterambere bigamije kurwanya ubukene n’inzara birimo ubuhinzi, ubworozi, n’indi myuga iciriritse byose bigaherekezwa n’isengesho nk’uko bigaragara mu ntego z’umuryango arizo Senga , Iga , Kora.

Kolping yatangijwe n’umusaseredoti wo mu gihugu cya Cologne mu Budage witwaga Adolph Kolping. wageze mu Rwanda tariki ya 19/12/ 1999 utangirira muri Diyosezi ya Butare paruwase ya Nyamiyaga. Kuri ubu umuryango ukaba umaze kugera muri Diyosezi zose mu Rwanda.

Buri mwaka tariki ya 27 Ukwakira 2023, Abagize umuryango mpuzamahanga wa Kolping bahimbaza umunsi mukuru wo gushyirwa mu bahire kwa Adolphe Kolping wawushinze banarushaho kumusabira ngo azashyirwe mu rwego rw’abatagatifu.