Abagize umuryango w'Isengesho rya Papa n'Inkoramutima z'Ukarisitiya bemeje gahunda z'ibikorwa by'uyu muryango muri uyu mwaka
Tariki 4-6 Ugushyingo 2022 i Kigali hateraniye inama yahuje Umuhuzabikorwa wa RMPP/MEJ ku rwego rw’igihugu, Abagize Komite n'abahuzabikorwa ku rwego rwa Diyosezi na ba Omoniye. Iyi nama iterana rimwe mu mwaka yasuzumiwemo ibikorwa bya RMPP na MEJ mu mwaka ushize inemeza ibikorwa n’imishinga bizakorwa mu mwaka w’ubutumwa wa 2022/2023.
Inama yitabiriwe n’amadiyosezi yose: Ba omoniye ba Diyosezi 5, Omoniye ku rwego rw’igihugu, Abahuzabikorwa ba Diyosezi 9, Abagize Equipe Nationale 6, Umuhuzabikorwa mu Rwanda, Umuhuzabikorwa mu Rwanda no mu Burundi n’abagishwanama 2.
Abitabiriye iyi nama bagejejweho ibyakozwe n'uyu muryango hagati ya 2019 na 2022 birimo: Inama nyungurana bitekerezo yasuzumye ibikorwa bya 2019-2022 no kwemeza ibizakorwa 2022-2023, yayobowe na Martin MUREKEZI; Amahugurwa ku ngingo zinyuranye no ku mishinga mpuzamahanga; Inyigisho kuri Spititualité Ignacienne - Exercice Spirituel, yatanzwe na Padri Gérard KALISA, SJ, Coordinateur Régional du RMPP/MEJ Rwanda-Burundi; Amahugurwa ku Nzira y’Umutima/Chemin du Coeur/The Way of the Heart, yatanzwe na Martin MUREKEZI, Coordinateur National du RMPP/MEJ Rwanda; Inyigisho ku buryo bwo kujya muri RMPP/Modalité de participation/Community participation, yatanzwe na Emmanuel MUNYAGISHARI, Umwe mu bagishwanama n'Inyigisho ku kurinda no kurengera abana n’abakuru bababaye/Protection et Sauvegardé les Mineurs et Adultes Vulnerable/ Protection and Safeguarding Minors and Adults Vulnerable, yatanzwe na Padri Gilbert KWITONDA, Aumȏnier National du RMPP/MEJ.
Muri iyi nama Kandi uyu muryango wakiriye ba omoniye bashya barimo: Padri Jean Bosco Niyonsenga, Omoniye wa MEJ Cyangugu wasimbuye Padri Francois Xavier Rukundo, Padiri Jean Maliyamungu, Omoniye wa MEJ Kibungo wasimbuye Padiri Daniel Bahati ndetse na Padiri Emmanuel Ndayishimiye, Omoniye wa mbere wa MEJ Nyundo. Uyu muryango ukaba ushimira Abepiskopi bawufasha kubona ba Omoniye.
Nk'uko byagaarutsweho n'abagize uyu muryango mu madiyosezi atandukanye, muri iki gihe gishize kuva muri 2019 abagize uyu muryango bakoze ibikorwa bitandukanye birimo: Kwishyurira Mituel abatishoboye, gusura no kugemurira abarwayi, kubakira no guhingira abatishoboye… hakozwe n’imirimo ya gitumwa: Guhereza, Gusoma, Kuririmba mu makorali, kubyina, Kwigisha Gatigisimu, ndetse abandi bakoze ubutumwa bwihariye nk'abagabuzi b’Ukaristiya, abari mu nzego z’abarayiki, kubyutsa abaguye n'ibindi. Abagize uyu muryango Kandi bakoze Sinodi basubiza ibibazo byateguwe. Abagize uyu muryango Kandi bagize uruhare mu bikorwa by’iterambere.
Kuri gahunda y'ibikorwa by'uyu mwaka RMPP/MEJ yashyizeho ingengabihe ikurikira: Mu Gushyingo 2022: Gutegura no guhimbaza Kristu umwami hategurwa amasezerano n'inyigisho zifasha abakristu; Mu Kuboza 2022: Hazakorwa Urugendo Nyobokamana i Kibeho, Imibare y’abazajyayo ikaba igomba gutanga bitarenze Tariki 30 Ugushyingo 2022. Muri Mutarama 2023 hazabaho gutegura no guhimbaza Umunsi w’urubyiruko abagize uyu muryango bakaba basabwa kwitabira ibikorwa bya Komisiyo y'Abepiskopi Ishinzwe Iyogezabutumwa ry'Urubyiruko. Muri Werurwe 2023 hazabaho Umwiherero w’igisibo kuri buri Centre, Equipe Nationale ikazatanga umurongo. Muri Kamena 2023 Ni Ukwezi k’ubutumwa hakazakorwa Noveni itegura Isakaramentu n'Icyumweru cya RMPP/MEJ. Muri Nyakanga 2023 hateganyijwe Yubile y'imyaka 25 y'amavugurura ya 2 ya MEJ ikazategurwa na Diyosezi ya Butare. Muri Kanama 2023 hateganyijwe Ibikorwa bya JMJ hakazaba Ihuriro ry’abanyamuryango bose muri Diyosezi izemezwa.
Inama nkiyi yaherukaga kuba kuwa 28-30/ 6/2019 i Kabgayi. Icyorezo cya Covid-19 cyakomye mu nkokora ibikorwa bimwe na bimwe ariko henshi biri gusubira mu buryo nkuko abahagarariye amadiyosezi babigaragaje.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
