Abakateshiste bateguye Urugendo Nyobokamana I save rwo gusabira umunsi Mukuru wabo.
Komisiyo ishinzwe Katesheze yateguye inemeza ko urugendo Nyobokamana rwo gusabira umunsi mukuru w’Umukateshisiti uteganyijwe kuzizihirizwa muri Paruwase ya Save tariki 17 Gicurasi 2025. Byagarutsweho mu nama yabaye ku itariki ya 23 Mutarama 2025 ku biro by’Inama y’Abepisikopi Gatolika mu Rwanda (CEPR) ikaba yari yitabiriwe n’abayobozi bakuru muri Kiliziya, Abapadiri, Abalayiki n’abandi.
Umunyamabanga Mukuru wa Komisiyo ya Katesheze mu Rwanda Sœur Genevieve Uwamariya yasobanuye ko urwo rugendo rwo gusabira uwo munsi uzizihizwa kuri Paruwase y’ i Save mu buryo bwo kuzirikana ko ariyo Kiliziya ya mbere yashinzwe mu Rwanda akaba ari naho (I Save) hashyinguye Abakateshisiti ba mbere babayeho mu gihugu.
Yagize ati: “Inama ya komisiyo ya katesheze yemeje ko tuzakora urugendo Nyobokamana i Save ku itariki 17 Gicurasi 2025. Tuzajya i Save, twibuka ko Save ariyo Paruwase ya mbere ari nayo ishyinguwemo Abakateshisiti bambere mu Rwanda.”
Sr Genevieve yanagarutse kuri gahunda yo kwitegura kwizihiza umunsi mukuru w’Umukateshisiti, avuga ko hazakorwa Noveni itegura uwo munsi izaba ifite insanganyamatsiko igira iti: “ Abakateshisiti turangamiye Kristu soko y’amizero, ubuvandimwe n’amahoro.” Iyo Noveni ikaba yarahawe abashinzwe Katesheze muri Diyosezi zitandukanye kugira ngo ishyikirizwe abakirisitu bose binyuze mu miryangoremezo.
Akomeza avuga ko nyuma ya Noveni itegura uwo munsi hazabaho urugendo Nyobokamana i Namugongo ruzakorwa tariki ya 28 Matarama 2025. Urwo rugendo ruzaba rugizwe n’abakateshisiti bo muri Diyosezi zitandukanye, buri Diyosezi ikaba izohereza abakateshisiti bahagarariye abandi baherekejwe n’Umupadiri. Sr Genevieve yavuze ko urugendo ruzasozwa ku ya 30 Mata 2025 rukazakurikirwa no kwizihiza umunsi w’Umukateshisiti uzaba tariki ya 25 Gicurasi 2025 ukazabera mu madiyosezi yose .
Bikaba biteganyijwe ko ku italiki 26-28 Nzeli 2025 umunsi mukuru w’umukateshisiti uzizihizwa ku rwego rw’isi.
Myr Filipo Rukamba umwepisikopi wa Diyosezi ya Butare uri mu kiruhuko cy’izabukuru yavuze ko hakenewe gukorwa ubushakashatsi kugira ngo amateka y’abakateshisiti bakoze ibikorwa bya gitwari muri Diyoseze zitandukanye ajye ahagaragara. Mu buryo bwo kubazirikana no kubashimira kuko ari abantu badakwiye kwibagirana bafashije abandi gutera intambwe mu kwemera.
Mu bindi byagarutsweho ni igikorwa cyo gukora ubushakashatsi bw’amateka y’abakateshisiti babayeho kugira ngo bongerwe mu gitabo cy’amateka y’abakateshisiti kuko byagaragaye ko habayeho abakateshisiti b’intwari kandi amateka yabo ntaho agaragara mu buryo bwanditse.
Hanzuwe ko amateka y’abakateshisiti azandikwa mu bice bitandukanye, bahereye ku mateka y’abakateshisiti ba mbere babayeho mu Rwanda.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
