Abakateshiste b'i Namugongo bakiriye abo mu Rwanda babaha n'impano

Aba bakateshiste b'ibihugu byombi bahuriye mu gitambo cya Misa cyabereye muri Bazilika y'Abahowe Imana b'i Bugande. Nyuma y'Igitambo cya Misa, Abakateshiste b'i Namugongo bafashe ijambo bashimira bagenzi babo bo mu Rwanda babasuye, babaha ikaze ndetse babashyikiriza n'impano iriho abahowe Imana bose b'i Bugande uko ari 22.

Ku ruhande rwabakateshiste bo mu Rwanda, bagaragarije ab'i Namugongo ibyishimo batewe no kugera ku gicumbi cy'ubukateshiste. Baboneyeho no kubashimira ko bafunguye amarembo y'ubukateshiste mu Rwanda, babaha ishusho y'Abamisiyoneri bagejeje Ivanjili mu Rwanda nyuma yo kuyigeza no mu gihugu cya Ugands.

Abakateshiste bo mu Bugande baganiriye na Kinyamateka bagaragaje ibyishimo batewe no guhura na bagenze babo bo mu Rwanda bavuga ko bifuza ko byagumaho.

Emelida Kamashoro wo muri Diyosezi ya Kabale paruwase ya Lusholoza umaze imyaka 11 akorera umurimo w'ubukateshiste I Namugongo. Yagize ati "Nashimishijwe ni uko abakateshiste bo mu Rwanda baje kudusura hano I Namugongo, twishimiye impano baduhaye zirimo imipira iriho ishusho ya Andereya Kaggwa umurinzi n'umuvugizi w'abakateshiste, twishimiye kubona Myr Filipo Rukamba waje abaherekeje ndetse n'abapadili bo mu Rwanda. Iki ni ikimenyetso cy'uko twunze ubumwe muri Yezu Kristu kandi turifuza ko twakomeza kunga ubumwe nk'abakateshiste bo mu Rwanfa no mu Bugande."

Emanuel Hamuremyi wavuze mu izina ry'abakateshiste bo mu Rwanda yavuze ko bihanganishije abakateshiste b'I Namugongo babuze abakateshiste babiri muri iki gihe. Ashimira abakateshisite bo muri Uganda bashishikariye kugeza inkuru nziza mu Rwanda dore ko umukateshiste wa mbere wageze mu Rwanda yari aturutse muri Uganda, agatangirira ubutumwa bwe i Save.

Uyu mwaka abateshiste bo muri Uganda barahimbaza imyaka 60 ishize abahowe Imana b'i Buganda babaye Abatagatifu. Bakaba bishimiye ko mu gihe bitegura ibi birori bakiriye Abakateshiste bo mu Rwanda nk'imbuto y'Abahowe Imana b'i Bugande.

Avuga ko umurimo w'ubukateshiste ari umurimo wo kwitagatifuza ukaba usaba uwukora kugira ukwemera gushinze imizi.

Yagize ati "Ndumva navuguruye ubukateshiste bwanjye, mpereye ku byo maze kubona hano I Namugongo. Nasanze intambwe yanjye mu bukristu nk'umukateshiste ikiri ntoya. Nzahakura imbaraga zizamfasha gukomera ku bukristu no kwigana aba bahowe Imana. Mpereye ku mateka y'uko bagiye babica byanyeretse ko bari bafite ukwemera guhamye kandi ni nako gukwiriye kuturanga natwe.”

Kuri uyu wa 25 Mata 2024 uru rugendo nyobokamana rw'abakateshiste I Namugongo rurakomereza ahitwa I Munyonyo aho bazasura ibindi bice bifite amateka y'ubukristu harimo n'aho abahowe Imana b'I Bugande bagiye bicirwa.