Abakozi b'Inama y'Abepisikopi gatolika mu Rwanda bizihije umunsi w'umurimo
kuri uyu wa gatanu tariki ya 12 Gicurasi 2023, abakozi ba Komisiyo na Serivisi zitandukanye z'Inama y'Abepisikopi Gatolika mu Rwanda (CEPR), bahimbaje umunsi w'umurimo, usanzwe wizihizwa kuwa 1 Gicurasi buri mwaka.
Ibi birori byabimburiwe n'Igitambo cya Misa cyatuwe na Padiri Safari Laurent, Umunyamabanga wungirije ushinzwe imari n'abakozi mu Nama y'Abepiskopi, afatanyije na Padiri Jean Pierre, Maniraruta umunyamabanga mukuru wungirije.
Inyigisho yatanzwe na padiri Safari yagarutse ku kamaro k'umurimo mu buzima bwa muntu. Ati "Akazi keza umukozi akora gahesha agaciro ubuzima bwe n'ubw'umuryango we. Abakozi bakorera mu Nama y'Abepisikopi Gatolika mukora imirimo yunganira abashumba n'Abasaseredoti, turabifuriza ko umurimo wanyu uhesha Imana ikuzo, ukabagirira akamaro ukanakagirira imiryango yanyu, twisunze urugero rwa mutagatifu Yozefu urugero rw'abakozi.”
Yakomeje avuga ko umurimo muri kiliziya ari ubutumwa, kandi ko imirimo yose ikorerwa muri kiliziya ikorwa mu buryo bwa gitumwa. Asaba abo bakorana bose gukora umurimo wabo bashimira Imana kandi bakaba ingirakamaro cyane cyane mu gukoresha imbaraga bafite bitangira kiliziya.
Nyuma y'Igitambo cya Misa hakurikiyeho kuganira no gusabana. Mu kiganiro kirambuye bahawe na Padiri Safari Laurent ushinzwe abakozi, yashimiye abak9zi uruhare bagize mu gutegura uyu munsi hagamijwe gusubiza amaso inyuma bakareba neza niba ibyo bakora binogeye Imana n'abantu.
Mu bindi bikorwa byaranze kwizihiza umunsi wumurimo harimo no gutora intumwa z'abakozi zihagarariye abandi mu bakozi b'Inama y'Abepisikopi Gatolika mu Rwanda nk'uko amategeko y'umurimo mu Rwanda abiteganya. Amatora yakozwe neza kandi yishimiwe n'abakozi kuko bagize uruhare mu kwitorera intumwa bazajya banyuzaho ibyifuzo n'ibitekerezo bikagezwa ku bayobozi.
Nsengiyumva Didace, usanzwe akorera mu biro bya Papa bishinzwe iyogezabutumwa (OPM) akaba n'Umunyamabanga mu rukiko rwa kiliziya TECIR, ni we watowe nk'umukozi uhagarariye abandi. Yavuze ko icyo bifuza ari uko abakozi barangwa no gukorera hamwe kandi bakamenya ko ari abogezabutumwa. Ati "Iyo uri umukozi muri CEPR ugomba kuba umwogezabutumwa, kandi ntabwo twabigeraho tutagendeye hamwe, nk'uko Sinodi y'uyu mwaka ibivuga."
Kugeza ubu mu Nama y'Abepisikopi Gatolika habarurwa abakozi bagera kuri 30 babarirwa muri serivise zigera ku 10, harimo ubunyamabanga rusange, Kinyamateka, komisiyo yurubyiruko , komisiyo yubutabera namahoro CEJP, komisiyo y'umuryango na service y'ubusugire bw'ingo (SNAF), ibiro bishinzwe uburezi (SNEC), ibiro bya gatigisimu, ibiro bya Papa bishinzwe iyogezabutumwa ku isi (OPM), urukiko rwa kiliziya (TECIR) ndetse na Komisiyo y'Abepisikopi ishinzwe ubutumwa bw'abalayiki. Insanganyamatsiko y'umunsi w'umurimo uyu mwaka igaruka ku kugira umutekano n'ubuzima busagambye ku murimo (la securite et la Sante au travail).
Ibitekerezo (0)
- Nta gitekerezo kirahaba. Ba uwa mbere utanga igitekerezo.
