Abepisikopi ba Kiliziya Gatolika muri Côte d’Ivoire barasaba ko amatora ya 2025 yaba mu mahoro, mu mucyo no mu bwisanzure.

Ni ubutumwa bwatangiwe mu nama yabereye ku cyicaro cya CECCI (Inama y’Abepisikopi Gatolika muri Côte d’Ivoire), iherereye i Abidjan. Mgr Marcellin Yao Kouadio, umwepisikopi wa Daloa akaba na Perezida w’inama y’abepisikopi gatolika muri Côte d’Ivoire (CECCI), ari nawe watanze itangazo mu izina ry’Abasenyeri bose. Yagize ati “Turasaba abayobozi b’igihugu, imitwe ya politiki, n’abaturage muri rusange guharanira ko amatora yegereje azaba mu mucyo, nta buriganya burimo, kandi akazakorwa mu bwisanzure bwuzuye.”

Abepisikopi bibukije ko amatora akozwe neza ari inkingi ya demokarasi, kandi ko ariyo soko y’amahoro n’iterambere rirambye. Bagaragaje impungenge z’uko amatora ashobora guteza imvururu n’amacakubiri mu gihe atagenze neza, nk’uko byagiye bibaho mu bihe byashize, cyane cyane mu matora yo mu 2010 no mu 2020 aho habaye imvururu zahitanye ubuzima bw’abantu benshi.

Abepisikopi basabye abategetsi kubahiriza amategeko n’amabwiriza agenga amatora, no kurekera Komisiyo y’amatora ubwigenge bwayo.

Abepisikopi basabye abategetsi kubahiriza amategeko n’amabwiriza agenga amatora, no kurekera Komisiyo y’amatora ubwigenge bwayo.

Basabye abanyapolitiki gukora ibikorwa byo kwiyamamaza mu mahoro, no kwirinda amagambo ateza urwango n’amacakubiri.

Abepisikopi kandi basaba itangazamakuru gutanga amakuru y’ukuri kandi yizewe, no kudahengamira uruhande urwo arirwo rwose. Basaba n’abaturage kwitabira amatora mu mahoro, no kubaha ibizayavamo.

Abepisikopi bishimiye ko abaturage benshi basigaye bagira uruhare mu bibera mu gihugu, ariko babasaba gukomeza gushyira imbere amahoro, ubumwe, n’ ubwubahane mu gihe cy’amatora.

Basabye kandi ko haba amasengesho n’ibikorwa by’iyobokamana bigamije gusabira igihugu kugira ngo amatora azagende neza.

Mu ijambo rye, Mgr Yao Kouadio yagize ati“Duhagurutse nk’abepisikopi kugira ngo dusabe ko amatora ya 2025 azaba mu bwisanzure, mu mucyo, no mu mahoro. Abaturage bacu barabikeneye kandi barabikwiye.”

Mu ijambo rye, Mgr Yao Kouadio yagize ati“Duhagurutse nk’abepisikopi kugira ngo dusabe ko amatora ya 2025 azaba mu bwisanzure, mu mucyo, no mu mahoro. Abaturage bacu barabikeneye kandi barabikwiye.”

Abepisikopi bagarutse ku ruhare rukomeye urubyiruko rushobora kugira mu kubaka amahoro. Bagaragaza ko kenshi usanga arirwo rukoreshwa mu bikorwa by’ubugizi bwa nabi mu gihe cy’amatora, barusabye kutagwa mu mutego w’ababashuka.

Mgr Kouadio yagize ati“Rubyiruko, ntimwumve abashaka kubakoresha mu nyungu zabo. Mube inkingi y’amahoro, ubumwe, n’ubutabera.”

Abepisikopi basabye abakirisitu n’abantu bose bafite ukwemera gusabira igihugu kugira ngo amatora azagende neza, atarimo imvururu, ahubwo azabe intangiriro y’ubuzima bushya burangwa n’amahoro n’ubumwe.

Ubutumwa bw’abepisikopi burasaba ko ibikorwa byose by’amatora bizajyana no kubahiriza amahame ya demokarasi, uburenganzira bwa muntu n’iterambere rirambye.

Abepisikopi bavuga ko amatora ya perezida atakagombye kuba intandaro y’indi ntambara, no kuzana amakimbirane mu muryango, kwangiza imiryango, ibikorwa by’urugomo, ibinyoma, guhonyora no gukandamiza ikiremwamuntu.”

Abepisikopi bo muri Côte d’Ivoire basabye ko habaho kwiyemeza gukora neza, kubaha agaciro ka muntu no kugira umwuga mu mashyaka ya politiki, abayobozi b’amadini, abakora itangazamakuru mpuzamahanga n’iry’igihugu, urubyiruko, n’ingabo n’abapolisi.

Bagira bati"Tuzarinda igihugu cyacu n’abaturage bacyo guhungabanywa. Ntitwifuza kongera kugira intambara nyuma y’amatora! Ntitwifuza ko abantu bapfa! Igihugu cyacu kiri ku rwego rw’ihinduka, ibihe bishya biri kuza kugira ngo dufate iya mbere mu kubona ejo hazaza heza. Basaba urubyiruko, abagore n’abagabo b’igihugu cya Cote d’Ivoire gukomeza kuba abaharanira amahoro mu gihugu cyabo.