Abepiskopi bagize ACEAC barasaba abakristu gusabira amahoro akarere k'ibiyaga bigari

Mu mwanzuro wa cyenda ugaragara mu itangazo risoza iyi nama, Abepiskopi basaba abakristu gatolika bose bo mu karere k'ibiyaga bigari, gutegura igitambo cy'ukarisitiya cyo gusaba amahoro, kuri iki cyumweru tariki 31 Nyakanga, ku munsi mukuru wa Mutagatifu Inyasi wa Loyola.

Muri ubu butumwa kandi Abepiskopi batanga insanganyamatsiko zazatoranywamo izakoreshwa kuri uwo munsi harimo: Mwese muri Abavandimwe (Mt 23, 8); Niduharanire ibishyigikira amahoro (Rom 14,19); Inkota zanyu nimuzicuremo amasuka, (Iz 2,4); Afurika haguruka ufate ingobyi yawe maze ugende (yoh 5,8); Umuntu wese wanga umuvandimwe we ni umwicanyi. Izi nsanganyamatsiko zikaba zigaragara mu butumwa Abepiskopi bagize ACEAC bagiye bageza ku bakristu mu bihe bitandukanye.

Iki cyemezo Abepiskopi bagifasha bashingiye ku ihungabana ry'umutekano ku mipaka y'ibihugu bigize ibiyaga bigari, by'umwihariko mu gice cy'amajyaruguru y'uburasirazuba bwa Kongo. Kubera iri hungabana rikomeje kugira ingaruka kuri benshi, Abepiskopi basabye abakristu kwitandukanya n'imitwe yigometse no kwitandukanya n'inzangano no guheza bamwe. Basabye kandi imitwe yitwaje intwaro n'abanyapolitiki gukoresha ubundi buryo butari intambara kuko igira ingaruka mbi kuri benshi. Banasabye abanyapolitiki kwirinda amagambo abiba urwango n'ivangura. Abepiskopi basabye n'abanyamadini kuba abantu baharanira kandi batera amahoro.