Abepiskopi Gatolika bo mu Rwanda no mu Burundi barishimira intambwe ikomeje guterwa mu guteza imbere ikenurabushyo ry’Umuryango

Iyi ngingo ni imwe muzagarutsweho mu nteko rusange ya ACOREB yateraniye muri “Centre Interculturel National, Oasis de Paix et Reconciliation-CINOPR ”ku wa 24 Kamena 2023 iyobowe na Myr Bonaventure Nahimana, Perezida w’Inama y’Abepiskopi Gatolika mu Burundi akaba n’umuyobozi wa ACOREB, yitabirwa n’Abepiskopi baturutse mu bihugu byombi.

Abepiskopi bagize Ishyirahamwe ACOREB basangiye amakuru ku ngingo 3 nyamukuru arizo: Kurebera hamwe uko Kiliziya ihagaze muri ibi bihugu babereye abashumba, Igihango cy’Uburezi cya Papa Fransisiko, Ikenurabushyo ry’Umuryango nka Kiliziya y’ibanze ukaba n’igicumbi cy’ubukristu; n’utuntu n’utundi.

Abepiskopi bishimiye kwakira bagenzi babo batatu bashya baherutse guhabwa Ubwepiskopi mu Rwanda aribo Myr Papias Musengamana Umwepiskopi wa Byumba wabuhawe ku wa 14 Gucurasi 2022, Myr JMV Twagirayezu Umwepiskopi wa Kibungo wabuhawe ku wa 1 Mata 2023, na Myr Balthazar Ntivuguruzwa Umwepiskopi wa Kabgayi wabuhawe ku wa 17 Kamena 2023.

Abepiskopi bagize ACOREB bishimiye gahunda y’urugendo rwa gishumba Abepiskopi bo muri buri gihugu baherutse kugirira i Roma, ruzwi nka “Visite Ad Limina Apostolorum” basangira amakuru ku byaranze buri rugendo, banashimira Nyirubutungane Papa Fransisiko wabakiriye ndetse akanabaha ubutumwa bwo kubashyigikira mu murimo bakorera Kiliziya.

Abepiskopi bashimiye gahunda ya Forum y’ingo yateraniye muri “Foyer de Charite de Bujumbura”kuva ku wa 22-25 Kamena 2023;ikitabirwa n’abakristu bubatse ingo bo mu Rwanda, u Burundi n’abo muri Diyosezi ya Uvira na Bukavu zo muri Repubulika iharanira Demokarasi ya Kongo. Bagaragaje ko inyigisho n’ubuhamya byatanzwe n’abitabiriye iyi forum ari ikimenyetso cy’iyogezabutumwa ryiza rikorerwa mu muryango, ikaba n’indi ntambwe iganisha kuri Yubile y’imyaka 125 Ivanjili imaze igeze muri ibi bihugu byombi. Banishimira ko iyi Forum ibaye igihugu cy’u Rwanda n’u Burundi byaramaze gufungura imipaka ibihuza, bikorohereza abaturage bo mu bihugu byombi kugenderanirana.

Ku ngingo irebana no guteza imbere uburezi, Abepiskopi bagarutse ku bikubiye mu Gihango cy’Uburezi Papa Fransisiko yagiranye n’Uburezi ku rwego rw’isi, ndetse ku mugabane w’Afurika hakaba haratangiye gushyirwa mu bikorwa ibikubiye muri iki gihango. Nyuma yo kuganira ku mbogamizi zinyuranye zibangamiye uburere bw’abana muri iki gihe, Abepiskopi basaba ababyeyi kuza ku isonga mu gutanga uburere bwiza mu miryango, abarezi n’abayobozi b’amashuri nabo bakabikora nk’umuhamagaro; umwana ntabe uwo ababyeyi be gusa ahubwo akaba uwo umuryango mugari. Abashinzwe kurera bose bagafatanyiriza hamwe bagamije kurera umwana ushoboye kandi ushobotse.

Mu guteza imbere iyogezabutumwa ryubaka umuryango, Abepiskopi biyemeje ubufatanye mu gushyiraho gahunda n’ibikorwa biteza imbere ikenurabushyo ry’umuryango; birimo ibiwufasha gukomera mu kwemera, bikazakorwa ku rwego rw’igihugu ndetse no ku rwego mpuzamahanga.

Mu gusoza, Abepiskopi bibukije abakristu ko Ugushyingirwa ari igisubizo ku muhamagaro Imana iha muntu, bikaba n’umuhamya nyakuri w’ibyishimo n’urukundo hagati y’abashakanye ndetse n’undi wese yaba uwo muri uwo muryango cyangwa uwo hanze yawo, hagamijwe guteza imbere umuco w’ubuzima.