Abizeramariya bungutse urugo rwa kabiri mu Bufaransa n'urwa cyenda ku mugabane w'Uburayi
Mu gihe Kiliziya ihimbaza umunsi mpuzamahanga w'Iyogezabutumwa, Diyosezi ya Reims et des Ardennes yo mu gihugu cy'u Bufaransa irishimira ishingwa ry'urugo rushya rw'Ababikira b'Abizeramariya batangiye ubutumwa muri iyi Diyosezi, ahitwa Signy le Petit.
Umuryango wa Abizeramariya ni umuryango w'Abihayimana ukomoka mu Rwanda, ukaba warashinzwe na Padiri SEKAMONYO Rafael tariki 26 Mata 1956.
Uyu muryango umaze kwagura amarembo ushinga ingo zitandukanye ku mugabane wa Afurika n'Umugabane w'u Burayi aho ufite ingo 2 mu gihugu cy'u Bufaransa zirimo n'urwo wungutse muri uku kwezi k'Ukwakira 2025.
Muri iki gihugu kandi uyu muryango wari usanganywe urugo nanone muri Diyosezi ya Reims ahitwa Givet. Uru rugo rwo rukaba rwarashinzwe muri 2021.
Uretse mu gihugu cy'u Bufaransa, Abizeramariya bafite urugo mu Bubiligi n'ingo 6 mu Butaliyani. Ingo zose ziri ku mugabane w'u Bulayi akaba ari ingo 9.
Uretse ku mugabane w'i Burayi, Abizeramariya bafite n'ingo mu bihugu bya Afurika birimo: RDC, KENYA, BURKINA FASO, TANZANIYA bakagira n'ingo 4 Muri Repubulika ya Santarafurika.
Kuri ubu Ingo 2 zo mu Bufaransa zirimo ababikira 3 buri rugo. Abo mu rugo rwa Givet bashinzwe kwigisha Iyobokamana n'indi mirimo y'ubutumwa ikorerwa by'umwihariko abakuze bibana. Abo mu rugo rwa SIGNY -LE-PETIT bashinzwe kwigisha Iyobokamana, Kwigisha amasengesho, Club zo gushaka ibyishimo, kwita ku mashuri yisumbuye n'Amakuru, kwita ku bahereza no gutegura inama zinyuranye.
Umuryango w'Abizeramariya ni ikimenyetso ko Abamisiyoneri atari abavuye i Burayi bazanye Inkuru nziza muri Afurika, ahubwo ko ari ubutumwa bureba umukristu wese bishingiye ku nshingano Yezu yasigiye abigishwa be ati"Nimugende mwigishe amahanga yose".
Ibitekerezo (0)
- Nta gitekerezo kirahaba. Ba uwa mbere utanga igitekerezo.
