Amafoto: Kabgayi yiteguye kwakira ibirori byo gutangiza Yubile y’impurirane 2025 na 125

Kugaragaza aho imyiteguro igeze no kumenyekanisha iyi Yubile byakozwe binyuze mu gitaramo cyabereye muri Bazilika nto ya Kabgayi. Iki kigataramo cyaririmbwemo n’amakorali arindwi ari muri paruwasi ebyiri ziherereye mu Mujyi wa Muhanga.

Korali eshatu zari zaturutse muri Paruwasi ya Gitarama ni; Régina Caeli, St Pierre na Angelus Dei mu gihe kuri Paruwasi Katederali haririmbye Immaculée conception, Umucyo, Pueri Cantores na Seminari nto ya Kabgayi (Siant Leon).

Indirimbo n’imikino yakinywe byose byagarukaga ahanini kuri Yubile hanagamijwe gususurutsa abari bitabiriye iki gitaramo.

Diyosezi ya Kabgayi yagaragaje ko mu kwitegura kwakira ibi birori, tariki ya 01 Gashyantare 2024 hatangiye Noveni yo gusabira izi yubile z’impurirane ndetse hari gutangwa ibiganiro ku bitangazamakuru bya Kiliziya, ibiganiro bigaruka kuri izi yubile.

Mu butumwa bwa Myr Balthazar Ntivuguruzwa, Umwepiskopi wa Diyosezi ya Kabgayi yasabye abakristu kuzitabira Misa yo gutangiza Yubile y’impurirane, imyaka 2025 Jambo yiguze umuntu n’imyaka 125.

Myr Balthazar yunzemo ko muri iyo Misa ari naho hazatangarizwa ibikorwa bizaranga urugendo rwa Yubile y’impurirane ndetse anabashishikariza kuzitabira ibikorwa byose biteganyijwe muri uko guhimbaza yubile.

Myr Balthazar yasoje asaba abakristu kugarukira Imana, guherekeresha isengesho ritaretsa ibikorwa bya yubile no kugendana amizero nk’uko insanganyamatsiko ibisaba.

Insanganyamatsiko ya Yubile y’imyaka 2025 Jambo yigize umuntu ni “Abagendana amizero” mu gihe insanganyamatsiko ya Yubile y’imyaka 125 Ivanjili igeze mu Rwanda ari “Turangamire Kristu we soko y'amizero, ubuvandimwe n'Amahoro”