Diyosezi ya Kabgayi yafunguye ku mugaragaro ikigo gitanga amahugurwa ku buhinzi n'ubworozi bitangiza urusobe rw'ibinyabuzima

Abagera kuri 55 basoje amahugurwa mu masomo bahawe impamyabumenyi mu birori byitabiriwe na Myr Balthazar Ntivuguruzwa, umwepiskopi wa Kabgayi n'abandi bayobozi batandukanye barimo umuyobozi mukuru wa RAB hamwe n'abayobozi ba SECODEV umushinga utera inkunga iki kigo kiswe CEFOPPAK.

Myr Balthazar Ntivuguruzwa umushumba wa Diyosezi ya Kabgayi yavuze ko inzozi za Diyosezi ya Kabgayi zabaye impamo kuko icyifuzo bagize cyagezweho hamwe na Caritas. Aha yavugaga ikifuzo cyatanzwe na Myr Smaragde Mbonyintenge cy'uko hashingwa ishuri ryigisha urubyiruko ubuhinzi n'ubworozi mu mwaka wa 2019. Ati "Mu ntego za Diyosezi ya Kabgayi harimo gukomeza guherekeza umuryango nyarwanda mu kugira roho nzima mu mubiri muzima, kandi iyo Roho nzima igomba no gutura mu isi nzima kandi itanga ubuzima."

Ati"Nk'umushumba mushya wa Diyosezi ya Kabgayi ndabizeza ko tuzakomeza kuguma muri uyu mu rongo nta gutezuka. Yasabye abanyeshuri barangije amahugurwa ku buhinzi n'ubworozi mu kigo CEFOPPAK kugenda bakabera itara imiryango n'abaturanyi kandi bakabigisha bashingiye ku bumenyi bahawe ko ubuhinzi bukoresha inyongeramusaruro kamere bushoboka kandi bukoreka ndetse n'imiti kamere ishoboka. Mu bufatanye n'inzego za Leta, abikorera, amabanki ndetse n'ibigo byimari tuzakomeza gufasha abarangije amasomo hano kugira ngo babone amahugurwa agamije kubafasha gushyira mu bikorwa imishinga baba bafite.”

Ndabamenye Telesphore, Umuyobozi mukuru mu kigo cy'Igihugu cy'ubuhinzi n'ubworozi (RAB) wari uhagarariye Minisiteri y'ubuhinzi n'ubworozi yizeje ikigo CEFOPPAK inkunga ishoboka kugira ngo ibikorwa birusheho kwaguka, yavuze ko imirima shuri iri i Kabgayi ari ikitegererezo cyiza ku buryo RAB igiye gusesengura icyakorwa kugira ngo igirane amasezerano y'imikorere n'imikoranire n'ikigo CEFOPPAK bitarenze ukwezi kwa Nzeri.

Ubuhamya butangwa n'urubyiruko rusoje amasomo, bavuga ko bize gukoresha ubutaka buto ariko bukavamo umusaruro utubutse kandi mwiza.

Simbiduhuje Pierrette wo muri Paruwasi ya Kanyanza yavuze ko ikigo CEFOPPAK cyabahaye ubumenyi butuma bafasha abaturage gukoresha ubutaka buto ariko bugatanga umusaruro. Ku bworozi nabwo babahaye ubumenyi butuma babasha gusuzuma amatungo yabo kandi bakayavura.

Ati "Ndishimye cyane kuba naraje kwiga muri iki kigo, Nize ubuhinzi bubungabunga ibidukikije , kandi tubasha no gukora ifumbire mborera twifashisha mu buhinzi bwacu. Mu bworozi, batworoje ingurube kandi nanjye nabashije koroza umuntu umwe duturanye, mbasha no gufasha abaturage barenga 15 mbagezaho imirama y'imboga turahinga kandi tubona umusaruro. Turashimira Caritas ya Diyosezi yacu kuko yadufashije hamwe n'abaduteye inkunga bose."

CEFOPPAK ni ikigo cyakira urubyiruko rutabashije gukomeza mu mashuri asanzwe ya Leta, ariko rwize nibura amashuri atatu yisumbuye (9 years ). Cyakira abahungu n'abakobwa biga baba mu kigo. Muri iki kigo abakobwa babyariye iwabo bemererwa kubazana kandi bakitabwaho mu buryo bukwiye butabangamira umubyeyi mu gihe cy'amasomo.

Kuri uyu munsi wo gufungura ku mugaragaro iki kigo abana 11 barererwa muri iki kigo bahawe impano zo kubashimira ko babaye abana beza.

Amahugurwa atangwa muri CEFOPPAK amara igihe cy'amezi 6 abana bakurikirana amasomo ku ishuri kandi babayo, nyuma y'amasomo bakajya kwimenyereza ibyo bize banabishyira mu bikorwa iwabo mu rugo cyangwa se bagakomereza ku ishuri.

Ikigo CEFOPPAK cyatangiye mu mwaka wa 2021 gitanga amahugurwa ku buhinzi n'ubworozi butabangamiye urusobe rw'ibinyabuzima, gifite intego yo kuba igicumbi cy'amahugurwa ngiro no gutanga umusaruro ukomatanyije giterwa inkunga na Diyosezi ya Kabgayi n'umushinga SECODEV (Service de Cooperation au Development) wo mu gihugu cy'u Busuwisi.

Kuri ubu ikigo gifite abanyeshuri 30 barimo abakobwa 4 bazanye n'abana babo. Bakaba baturuka mu turere 4 tw'intara y'Amajyepfo aritwo: Kamonyi , Muhanga, Ruhango na Nyanza.