Diyosezi ya Kabgayi yasoje ku mugaragaro urugendo rwa Yubile y’impurirane yishimira imbuto zeze

Ibirori byitabiriwe n’abepisikopi batatu basimburanye ku kuyobora Diyosezi ya Kabgayi, Myr Anasatase MUTABAZI uri mu kiruhuko yayoboye Diyosezi ya Kabgayi kuva mu mwaka w’1996-2004, yasimbuwe na Myr Smaragde MBONYINTEGE uri mu kiruhuko cy’izabukuru wayoboye Diyosezi ya Kabgayi kuva mu mwaka wa 2006-2023, asimburwa na Myr Balthazar Ntivuguruzwa uheruka guhabwa inkoni y’ubushumba .

Hari kandi abapadiri bakuru bayobora za paruwasi , ubuyobozi bw’akarere ka Ruhango , inzego z’umutekano , Abihayimana mu miryango itandukanye, abakristu baje bahagarariye abandi bavuye muri paruwasi zose za Diyosezi ya Kabgayi uko ari 31 n’imbaga y’abakristu ba Paruwasi ya Ruhango baje kwishimira isozwa rya Yubile y’impurirane no guhamya ko Yubile yababereye umwaka w’ibyishimo n’amahoro.

Mu nyigisho ye Myr Balthazar Ntivuguruzwa umwepisikopi wa Diyosezi ya Kabgayi ,yavuze ko uyu ari umunsi wo gushimira Imana byimazeyo kuko yaherekeje iyi Diyosezi mu rugendo rwa Yubile y’impurirane yari imaze imyaka 2. Yagize ati” Kuri uyu munsi wuje ineza n’imigisha Kiliziya ya Diyosezi ya Kabgayi iteraniye hamwe kugira ngo dusoze Yubile y’impurirane, Yubile y’imyaka 2025 y’ugucungurwa kwa muntu na Yubile y’imyaka 125 ivanjiri igeze mu Rwanda. “

Akomeza avuga ko Yubile yabaye igihe cyo kwisuzuma no gushimira Imana, yatubereye akanya ko gusubiza amaso inyuma muri iyi myaka 125 ishize ivanjiri igeze mu Rwanda by’umwihariko muri Diyosezi ya Kabgayi, nyuma y’imyaka 6 gusa igeze ku butaka bw’u Rwanda . Ni amahirwe akomeye kuko Diyosezi aya Kabgayi ari yo ya mbere mu Rwanda yashinzwe. Uwaje ayoboye abatuzaniye ivanjiri Myr Jean Joseph Hirth akaba ari nawe wayiyoboye.

Myr yavuze kandi ko ari umwanya wo gushimira Imana ibyo yatanze n’ibyo yakoze muri iyi myaka ishize twakiriye inkuru nziza ya Yezu Kristu . Ati” Muri iyi myaka yose ubukristu bweze imbuto nziza kandi nyinshi, bwageze hose bufasha abakuru n’abato kwivugurura no kumenya Imana by’ukuri none ubu tukaba twishimira ko Diyosezi yacu imaze kuba ubukombe aho imaze kugira paruwasi 31 ibigaragaza ukuntu ivanjiri igenda yogera hose kandi ishinga imizi hose.“

Myr Balthazar yavuze ko iyi Yubille isize imbuto nyinshi zeze ku buntu bw’Imana n’impuhwe zayo . Yagize ati” Hari abafashe umugambi wo kwivugurura bagarukira Imana, abakristu benshi banyuze mu muryango w’impuhwe, abakristu bakoze ingendo nyobokamana nyinshi, abahawe amasakaramentu cyane cyane ay’ibanze ariyo batisimu, Ukarisitiya n’ugukomezwa, isakaramentu rya Penetensiya naryo ryaraganwe ku buryo budasanzwe."

Yakomeje agira ati "Hari abakristu benshi bagarukiye igitambo cy’ukaristiya, barenga imbogamizi z’uko iwabo za Kiliziya zabo zari zifunze, habayeho ibikorwa by’impuhwe n’urukundo bitabarika, habayeho imihimbazo inyuranye haba ku rwego rw’igihugu , Diyosezi na za Paruwasi, hari imiryango y’abakristu yari itabanye neza ikaba yariyunze ndetse n’abantu kugiti cyabo bakaba barasabanye imbabazi bakagera ku bwiyunge bw’ukuri. Hari n’ibindi byiza byinshi umuntu atarondora aka kanya byose byavuye mu nsanganyamatsiko twagenderagaho “Kristu Soko y’amizero, ubuvandimwe n’amahoro. “

Myr Balthazar ashimangira ko Diyosezi ya Kabgayi Imana yayisize amavuta y’ubutore, yayihaye Imbaraga za Roho mutagatifu ibinyujije mu bakristu kugira ngo Imana isange abantu bose, ibagezeho inkuru nziza , ikore ibikorwa by’impuhwe n’urukundo, yite ku banyantege nke n’abatagira kivurira. Ati” Ibyo byose tugomba kubishimira Imana byimazeyo kandi tugashimira na mwe mwese mwabigizemo uruhare rwihariye.”

Mu gusoza Yubile y’impurirane Diyosezi ya Kabgayi irahamagarirwa kongera gukangura ingabire ya Batisimu muri buri mukristu, kubaka imiryango ya gikristu ifite ubuzima, isenga kandi irangwa n’ubumwe n’ubuvandimwe. Irahamagarirwa gushyira imbaraga mu kwigisha ukwemera cyane cyane mu bana no mu rubyiruko . Twese turahamagarirwa kubaka Kiliziya yita ku barwayi n’abandi bose bababaye . NK’umuryango w’Imana muri Diyosezi ya Kabgayi, turahamagarirwa kwita ku isanamitima no kubyara abakristu b’abubatsi b’amahoro, ubutabera n’ubwiyunge mu muryango nyarwanda.

Umuyobozi w’akarere ka Ruhango wungirije ushinzwe iterambere ry’imibereho myiza y’abaturage MUKANGENZI ALPHONSINE yifatanyije n’abakristu ba Diyosezi ya Kabgayi mu birori byo gusoza Yubile y’impurirane y’imyaka 125 ivanjiri igeze mu Rwanda n’imyaka 2025 y’ugucungurwa kawa muntu Yavuze ko ubuyobozi bw’akarere ka Ruhango bagiye bakorana neza na Kiliziya gatolika, bafatanyije muri byinshi nko mu burezi, ubuzima no mu bikorwa by’iterambere byose barabifatanya umunsi ku wundi. Ibi byose kandi byatumye abaturage bagira amahirwe yo kubona Service zinoze. Icyerekana ko Kiliziya gatolika n’ubuyobozi bw’inzego za leta bifatanya mu guharanira ikiza ku baturage , bishingiye ku bufatanye bwubaka igihugu cyacu muri rusange no mu karere ka Ruhango by’umwihariko mu mahoro n’ubumwe duharanira iteka ryose.

Yongeyeho ko Kiliziya Gatolika muri Ruhango ifite umwihariko ukomeye wo kuba habarizwa ingoro ya Yezu Nyirimpuhwe yabaye igicumbi cy’iyobokamana, yafashije abanya Ruhango n’abaturuka hirya no hino mu gihugu no mu bindi bihugu duturanye. Yabaye isoko y’ihumure n’ubufasha ku bantu bose bayigana. Yashimiye Kiliziya Gatolika imirimo myiza yo gutunganya Ingoro ya Yezu Nyimpuhwe ikomeje gukorwa ku gira ngo bazongere bayisengeremo imeze neza.

Nzayino Pascal umukristu uhagarariye abandi muri Paruwasi ya Ruhango akaba n’umuyobozi w’inama nkuru ya paruwasi yavuze ko mu mbuto z’ingenzi bakuye muri iyi Yubile bishimira harimo guhimbaza amasakaramentu yose aho abakristu benshi bongereye imbaraga mu isengesho, abakristu bagahurira mu miryangoremezo kabone naho Kiliziya zari zifunze ariko ubukristu bwarakomeje. Kubaho ubuzima bushingiye ku ivanjiri ari ryo jambo ry’Imana, bavuguruye imitima kandi bahumurizwa na Yezu Nyirimpuhwe biyemeza kubana mu rukundo, imbabazi n’ubwiyunge mu miryango yabo. Bavuguruye ubutumwa, biyemeza kudahera mu mateka y’ivanjiri gusa, ahubwo bakaba abahamya bayo mu bikorwa by’urukundo bafasha abatishoboye bakabagarurira ikizere cy’ubuzima.

Umukristu uhagarariye abandi yongeye gushimangira ko ubukristu bwagize uruhare rukomeye mu kubaka igihugu cyacu. Ati” Kuba umukristu bigendana n’indangagaciro z’ubumwe, umurimo, ubunyangamugayo n’amahoro.” Yizeje ko imbuto za Yubile zitazaguma mu magambo gusa ahubwo zizaba imibereho ya buri munsi , aho buri mukristu azaba urumuri n’umunyu w’isi mu muryango n’ igihugu cyacu.

Yubile y’impurirane y’imyaka 2025 y’ugucungurwa kwa muntu n’imyaka 125 ivanjiri igeze mu Rwanda yatangijwe k’umugaragaro ku itariki ya 10/02/2024 I Kabgayi muri Basilika nto hamwe na Kiliziya yose y’u Rwanda. Ni Yubile yari ifite insanganyamatsiko igira iti “Turangamire Kristu Soko y’amizero ubuvandimwe n’amahoro. Kuva icyo gihe Yubile yagiye ihimbazawa mu byiciro bitandukanye hirya no hino mu ma Diyosezi no muri za Paruwasi. Yubile y’impurirane yasojwe ku rwego rw’igihugu ku ya 06/12/2025 muri Arkidiyosezi ya Kigali.