Diyosezi ya Kabgayi yatangije Komisiyo y’ubudaheza abafite ubumuga mu rwego rwo guteza imbere imibereho myiza iganisha ku iterambere rirambye.

Mu izina ry’umwepisikopi wa Diyosezi ya Kabgayi Myr Balthazar Ntivuguruzwa ari nawe watangije igitekerezo cy’uko habaho komisiyo y’ubudaheza abafite ubumuga muri Diyosezi ya Kabgayi. Padiri Sylivere Komezusenge igisonga cy’umwepisikopi waje ari n’intumwa ya Myr yatangaje kumugaragaro ko Komisiyo y’ubudaheza itangiye muri Diyosezi ya Kabgayi. Yagize ati” Komisiyo y’ubudaheza abafite ubumuga muri Diyosezi yavutse mu minsi yashije, uyu munsi dutangaje kumugaragaro ko itangiye ibikorwa byayo no gushyira mu bikorwa inshingano zinyuranye iyi komisiyo yahawe. Dutangiranye imbaraga n’ubushake, imbarara z’uko turi kumwe namwe muhagarariye imiryango itandukanye yita ku bantu bafite ubumuga n’inzego za leta zitandukanye. Ubushake bw’uko ibyo dukora bishoboka kandi bikaba bishingiye ku ivanjiri.”

Padiri Sylivere Komezusenge akomeza avuga ko guhindura imyumvire ari urugamba rwatangiye kera kuko na Yezu yabikoze. Igihe bari bamuzaniye umuntu ufite ubumuga ngo amukize, bamubajije niba ari ababyeyi be bacumuye cyangwangwa se ari we ubwe wacumuye. Yezu abasubiza ko muri bose nta n’umwe wacumuye.

Yagize ati” Ubwo habonetse komisiyo y’ubudaheza abafite ubumuga, izamanuka ikagera mu muryangoremezo iturutse ku rwego rwa Diyosezi, urugamba rwo guhindura imyumvire no gukosora ibyari bitameze neza bigiye koroha kandi bitabangamiye ibindi bikorwa byiza.” Iyi komisiyo ije ishibutse ku nkuru nziza, uyu akaba ari umwanya wo kuyishyira mu bikorwa. Inkuru nziza ni ukuba uburenganzira bwawe bwubahwa kimwe nk’ubw’abandi, kuba ukora ibyo ushinzwe muri gahunda zawe udahutazwa kandi udahezwa muri gahunda zifitiye igihugu cyawe akamaro. Inkuru nziza ni ukuba uhabwa akanya ukagira uruhare mu byo wifuza kugiramo uruhare kandi ubifitiye ubushobozi no kuba wumva nta karengane kakuri imbere ngo kakubere inzitizi mu kwigaragaza kwawe. Yatanze urugero rutanga ikizere rwo kuba na Papa Francisko umushumba wa Kiliziya ku isi agendera mu igare ry’abantu bafite ubumuga kandi ntibimubuze gukora ubutumwa ashinzwe ku isi hose.”

Padiri Sylivere yifurije buri wese ko inkuru nziza yagera mu buzima bwe ariko cyane cyane buri wese akabigiramo uruhare kuko ari yo ntego y’iyi komisiyo. Ati”Birashoboka kuko na Yezu ubwe yarabivuze ati kumenyesha abakene inkuru nziza n’abapfukiranwaga ko babohowe. Twese hamwe nk’ingingo z’umubiri umwe, turebe mu cyerekezo kimwe, dutizanye imbaraga,dutahirize umugozi umwe kandi n’Imana turi kumwe.”

Komisiyo y’ubudaheza abafite ubumuga muri Diyosezi ya Kabgayi izakorera mu turere twose Diyosezi ikoreramo ubutumwa ari two:Kamonyi, Muhanga,Ruhango n’igice cya Nyanza.

Umuyobozi w’akarere ka Kamonyi wungirije ushinzwe imibereho myiza y’abaturage, Madame Marie Josée Uwiringira yashimiye Diyosezi ya Kabgayi itangije iyi komisiyo.

Yavuze ko iyi komisiyo ije ari igisubizo mu turere 4 twose Diyosezi ikoreramo kuko izabafasha kugera ku ntego yo kwimakaza ubudaheza kugira ngo ufite ubumuga agire uruhare mu bimukorerwa.

Yavuze ko hakiri imbogamizi kandi zizwi zikibangamira abafite ubumuga, ariko kandi ko hari impinduka zigenda zigaragara ku bufatanye bw’imiryango itandukanye yita ku bafite ubumuga n’izindi nzego zitandukanye. Yizeje komisiyo nshya y’ubudaheza abafite ubumuga muri Diyosezi ya Kabgayi ubufatanye burambye mu butumwa bwayo.

Padiri Gasasira Jean Bechmas umuyobozi wa Caritas Diyosezi ya Kabgayi yavuze ko iyi komisiyo ije kugira ngo ifatanye n’izindi komisiyo zisanzwe muri Diyosezi mu kurushaho kurinda icyubahiro cya muntu Imana yamuremanye. Agira ati” Iyi komisiyo ije igamije kunonosora icyubahiro twahaga umuntu ariko ntitukigeze aho tugomba kukigeza. Umuntu ufite ubumuga kiliziya iramufasha kuva kera nk’uko na Yezu yabiduhayeho urugero.

Iyi Komisiyo y’ubudaheza abafite ubumuga muri Diyosezi ya Kabgayi ivutse ku bufatanye bwa Caritas ya Diyoseze ya Kabgayi n’ihuriro ry’imiryango yita ku bafite ubumuga NUDOR.

Uyu munsi komisiyo ije kugira ngo umuryango wose uhugukire gufasha umuntu ufite ubumuga ku buryo burambye. Atari ukumubonera ifunguro rimuramutsa gusa cyangwa kubona icyo yambara gusa, ahubwo kugira ngo nawe abashe kuba yakwinjira mu murongo nk’abandi, nawe atange umuganda we, yifashe kandi nawe abe yafasha n’abandi benshi, nyuma yo gukuraho inzitizi zibuza umuntu ufite ubumuga kugera aho yagombaga kugera.

Jean Damascène Hafashimana umujyana muri NUDOR wari uhagarariye umuyobozi wa NUDOR, yavuze ko nk’ihuriro ry’imiryango y’abantu bafite ubumuga bishimiye kunguka umufatanyabikorwa ukomeye mu bijyanye na gahunda zo guteza imbere abafite ubumuga ku rwego rw’igihugu.

Ati” NUDOR turashimira cyane Giliziya Gatolika Diyosezi ya Kabgayi ku buryo bwimazeyo kuko ari umufatanyabikorwa mwiza dufatanya urugendo rwo kwita ku bafite ubumuga. Gahunda y’Ubudaheza buri wese agomba kuyigira iye kugira ngo iterambere ry’umuntu ufite ubumuga rigerweho. Iyi komisiyo ni umufatanyabikorwa ukomeye kuko izagera ku bantu benshi batandukanye, tukaba tubasaba ko mu bikorwa byose bitegurwa mwazajya mushyiramo na gahunda yo gufasha abantu bafite ubumuga. Yasabye komisiyo y’ubudaheza abafite ubumuga muri Diyosezi ya Kabgayi gushyira mu bikorwa inshingano zayo kandi ikagaragaza ubudasa mu nzego zose zizashyirwaho bazirikana gushyiramo n’abafite ubumuga kugira ngo ijwi ryabo naryo rikomeze kumvikana mu kugaragaza inzitizi z’ibyo bahura nabyo kandi bifuza ko zakemurwa. Yasoje avuga ko bazakomeza kubaba hafi no kugirana ubufatanye buhoraho mu rwego rwo guteza imbere imibereho myiza y’abafite ubumuga no kugera ku iterambere rirambye.

Padiri Niyonzima Jean Claude wahawe ubutumwa bwo kuyobora iyi komisiyo nshya y’ubudaheza abafite ubumuga muri Diyosezi ya Kabgayi yavuze ko imvano y’iyi komosiyo ari ikifuzo cy’umwepisikopi ahereye ku bikorwa bisanzwe muri Diyosezi ya Kabgayi bifasha abafite ubumuga ku bufatanye na servise zitandukanye zisanzwe muri Diyosezi. Agira ati”Ikifuzo cy’umwepisikopi wacu cyo gushinga komisiyo y’ubudaheza abafite ubumuga, ni ukugirango dufashe abafite ubumuga kwinjira mu iyogezabutumwa rusange rya Diyosezi ya Kabgayi, bakibonamo ,bakisanzura kandi bakumva ko bafite uburenganzira kuko ari abantu nkatwe.”

Agaragaza imirongo migari iyi komisiyo izibandaho, Padiri Jean Claude yavuze ko icya mbere ari ukwimakaza ubudaheza. Asobanura ko ubudaheza ari urugendo rugamije impinduka mu muryango mugari aho buri wese yisanga.

Guhuza ibikorwa byose byari bisanzweho bifasha abafite ubumuga, Komisiyo ikaba ije kubihuriza hamwe kugira ngo tugire umurongo umwe muri Diyosezi. Kubaka ubushobozi bw’abantu bafite ubumuga, hashakwa ubushobozi muri Diyoseze, muri paruwase no mu bafatanyabikorwa kugira ngo abafite ubumuga bagire uruhare mu iterambere ryabo bwite, mu miryango bavukamo ni iry’igihugu muri rusange.

Munyangeyo François d’Assise umukozi wa Caritas ya Diyosezi ya Kabgayi ushinzwe gukurikirana ibikorwa by’abafite ubumuga muri Diyosezi avuga ko mbere na mbere iyi komisiyo ije gufasha abafite ubumuga gukomeza kwisanga mu muryango w’abakristu. Ni komisiyo izita ku bantu bafite ubumuga ariko harebwa mbere na mbere icyo abafite ubumuga bakeneye. Yagize ati”Iyi komisiyo izakorana n’inzego za kiliziya zisanzweho, icyo izakora ni ukumenya ngo abantu bafite ubumuga bari he? ni bangahe, bakeneye iki? Igikomeye cyane, ni ukubakuriraho inzitizi zituma badakora nk’ibyabandi bakora kubera ubumuga. Hakenewe urwego rubatekereza kugirango bishimire service zose haba mu kiliziya cyangwa ahandi hose bitabweho nk’ikiremwa muntu nk’abandi bose.”

Diyosezi ya Kabgayi niyo ibimburiye izindi diyoseze mu gushyiraho iyi Komisiyo y’ubudaheza abafite ubumuga. Izagendera ku ndangagaciro zo kubahiriza uburenganzira bwa muntu, guha agaciro icyubahiro gikwiye ikiremwa muntu, ubukristu bushingiye ku bwitange, ubudaheza bushingiye ku mpamvu iyo ari yo yose, gutega amatwi abafite ubumuga, ubufatanye, ufite ubumuga agomba kugira uruhare mu bimukorerwa no kwishakamo ibisubizo.