Diyosezi ya Nyundo yungutse Paruwasi ya 29

Ni ibirori byabanjirijwe n’igitambo cy’Ukaristiya cyatuwe n’Umwepiskopi wa Diyosezi ya Nyundo, Musenyeri Anaclet Mwumvaneza ndetse bikaba byitabiriwe n’abayobozi mu nzego za Leta barimo Umuyobozi w’agateganyo w’Akarere ka Rutsiro, Prosper Mulindwa ndetse n’abayobozi b’Imirenge ya Nyabirasi na Nyundo.

Myr Anaclet Mwumvaneza mu butumwa yagejeje ku bakristu, yasobanuye ko Paruwasi atari amazu, imirima cyangwa amacumbi (…) ahubwo ari umuryango w’Imana uhujwe n’ijambo ryayo.

Yagize ati: “Paruwasi ni ahantu Imana ihurira n’umuryango wayo ikawumenyesha ugushaka kwayo.”

Yakomeje ashimira abakrisitu ba Nyabirasi n’inshuti zabo ku bw’uruhare ‘ruziguye cyangwa rutaziguye’ bagaragaje mu kubaka iyi paruwasi kuva itangira kubakwa kugeza yuzuye.

Ati: “Turashimira abatanze inkunga mu buryo butandukanye, bwaba amafaranga, imbaraga z’amaboko ndetse n’ibitekerezo.”

Myr Anaclet yasabye abakristu ba Nyabirasi ko paruwasi yababera Inzu y'Imana iwabo izabafasha kwegerana n'Imana no kwakira ingabire zayo.

Ati: “Iyi Paruwasi izabe aho muzajya muhurira n’Imana kurushaho kuko ije kubafasha kurushaho kumenya Imana. Ni ikimenyetso cy’aho muzajya muhurira kugira ngo ibagezeho ugushaka kwayo.”

Yakomeje agira ati: “Iyi Paruwasi izabafashe kumenya inzira z’Imana, gufatanya mu bikorwa byubaka paruwasi kuri Roho no ku mubiri. Abaseta ibirenge, abatabashije kuhagera, muzabatabarize, mubashyire abasaserdoti kugira ngo babafashe guhura n’Imana by’umwihariko mu Masakaramentu bazahahererwa.”

Umuyobozi w’agateganyo w’Akarere ka Rutsiro, Prosper Mulindwa, yashimiye Umwepiskopi wa Diyosezi ya Nyundo wemeye ko Nyabirasi iba Paruwasi. Avuga ko ari imbaraga n’amaboko Akarere ka Rutsiro kungutse.

Byari ibyishimo bikomeye ku bakrisitu b’iyi paruwasi nshya kuko bari bamaze imyaka irenga umunani basabye ko bahabwa paruwasi.

Nzigiyimana Fabien, umaze imyaka 14 ari Umuyobozi wa Santarali ya Nyabirasi ari na we Muyobozi wa Paruwasi Nshya ya Nyabirasi, yatangarije Kinyamateka ko ari ibyishimo bikomeye kuba bahawe paruwasi nyuma y’imyaka umunani bayisabye.

Yashimiye umwepiskopi wa Diyosezi ya Nyundo ubaruhuye urugendo rw’ibirometero birenga bitanu, bajyaga bakora bajya kuri Paruwasi Katederali ya Nyundo, ndetse anamwizeza ko abapadiri abahaye biteguye kubafasha kuryoherwa n’ubutumwa bazakorera muri iyi paruwasi.

Ati: “Mu nshingano ze n’ubushishozi bwe turamushimiye tubikuye ku mutima kuko za ngendo twakoraga ubu ziragabanutse ndetse turamwizeza ko tutazaba paruwasi ijenjetse.”

Umwepiskopi wa Nyundo kandi yakiriye Indahiro ya Padiri Noheli Hitimana, amuha n'ibirango bya Paruwasi. Paruwasi ya Nyabirasi ikaba itangiranye abakristu 7108.

Muri ibi birori Myr Anaclet Mwumvaneza yahaye umugisha inyubako zitandukanye zirimo Kiliziya ya Paruwasi ya Nyabirasi yuzuye itwaye Miliyoni mirongo inani (80M), n'ibiro ndetse n'amacumbi y’abapadiri bazakorera ubutumwa muri iyi paruwasi.