GS Nyakinama I yahimbaje Kristu Umwami yisunze

Ibi birori byabereye ku cyicaro cy'iri shuri, bibimburirwa n’igitambo cya Misa cyatuwe na Padiri Féstus NZEYIMANA, ushinzwe guhuriza hamwe ibikorwa by’ikenurabushyo muri Diyosezi ya Ruhengeri.

Byitabiriwe kandi n’abasaseridoti, abihayimana, abayobozi mu nzego bwite za Leta, abarangije muri iri shuri, abahawe amasakaramentu n’ababyeyi babo, abashyitsi, abarezi, abanyeshuri n’abandi batandukanye.

Mu butumwa yagejeje ku bitabiriye ibi birori, Padiri Féstus NZEYIMANA, yagarutse ku gisobanuro cy'uyu munsi uhimbazwa kuva mu mwaka wa 1925.

Ati "Umunsi mukuru wa Kristu Umwami ni umunsi ukomeye. Utwibutsa ko Kristu ari Umwami w’amahanga yose n’ibiremwa byose. Uyu munsi mukuru utwereka uko ingoma y’ubwami bwa Kristu itandukanye n’ingoma y’ubwami bw’isi, kuko ingoma y’ubwami bw’isi yarangwaga n’ububasha burenze, icyubahiro, kwica bagakiza, intebe za cyami, ingabo n’intwaro za kirimbuzi, n’ibindi..Mu gihe ingoma ya Kristu ari ingoma yo kwemera gupfa mu mwanya w’abantu, no gukoresha intwaro y’urukundo no kwicisha bugufi."

Padiri Festus yakomeje asaba abitabiriye ibi birori gukomera kuri Kristu bikagaragazwa no kuba abantu barangwa n'urukundo rwitangira abandi.

Padiri Mukuru wa Paruwasi Nyakinama Père Félix UWIMANA, MIC, yasabye abitabiriye uyu munsi mukuru kurushaho gushyira hamwe no kwitangira abana kuko aribo Kiliziya y'ejo. Yabibukije kandi insanganyamatsiko y'uburezi Gatolika muri uyu mwaka ariyo “umunyeshuri usukuye, mu ishuri riskuye”.

Kuri ubu GS Nyakinama ya I, yigamo abanyeshuri 1917 barimo 311 mu kiciro cy'incuke, 1053 mu mashuri abanza na 553 mu mashuri yisumbuye. Ifite kandi abarezi 65. Ikaba imaze guha impamyabumenyi abagera kuri 235 guhera muri 2014.