Hano si iwanyu - Musenyeri Anaclet Mwumvaneza abwira urubyiruko rugororerwa Iwawa

Mu butumwa bwe, Musenyeri Anaclet Mwumvaneza, yasabye uru rubyiruko kwemera rugahinduka nk'uko indangagaciro zaho zibigarukaho.

Yagize ati: “Uyu munsi twahuriye aha kugira ngo twiragize Imana nka gahunda dusanganwe muri Kiliziya. Ubutumwa nyamukuru rero twabazaniye ni ukubabwira ko umwanya wanyu utari hano Iwawa kuko mwagakwiye kuba muri mu kazi, hamwe n’ababyeyi cyangwa umuryango kugira ngo muteze imbere igihugu,”

“Icyo Kiliziya ibifuriza nuko uburere muhabwa aha ngaha bwabafasha, mukazasubira mu buzima busanzwe kugira ngo dufatanye kubaka igihugu kuko iwanyu si hano. Ndagira ngo rero mu nyingisho muhabwa aha, uburere muhabwa, mujye mutekereza neza kugira ngo ibyatumye muza aha bitazongera ukundi.”

Yakomeje abasaba kuzaba umusemburo w’impinduka nziza ku bandi mu gihe bazaba basubiye mu buzima busanzwe.

Ati: “Ndagira ngo mbibutse ko nimuva hano, mugomba no kuba umusemburo ku bandi bakiri mu bikorwa bidahwitse, kugira ngo n’igice kikiri mu businzi, ubusambanyi, ubutinganyi, n’ibiyobyabwenge kigaruke ibuntu kuko ibyo barimo byose ari ibyangiza ubuzima Imana yaduhaye,”

“Ibi biyobyabwenge bitumye mwicaye hano, bituma duhemukira Imana, ababyeyi batureze, igihugu kitwitangira gishaka ko dutera imbere, ndetse na Kiliziya n’amatorero byifuza ko tuba abantu bazima kuri Roho no ku mubiri.”

Myr Mwumvaneza yibukije uru rubyiruko kuzima amatwi abazashaka kongera kubashora mu businzi n’ibiyobyabwenge igihe bazaba basubiye mu muryango Nyarwanda mugari.

Ati: “Muzahura n’abababwira bati musome ku ko ku mugongo w’ingona ‘urumogi’, abazabagurira inzoga n’ibindi kuko mutari mubiherutse. Muzababwire muti No No...Muzave aha muhindutse burundu ahubwo mukangurire bagenzi banyu nabo kubivamo kuko nta mushinga urimo.”

Yongeye gusaba uru rubyiruko kuzabyaza umusaruro Imyuga itandukanye bigira kuri iki kirwa; imyuga irimo ubuhinzi, ububaji, ubudozi, ubwubatsi ndetse n’amategeko y’umuhanda.

Ati: “Igihugu cyasanze ari ngombwa ko abantu boherezwa aha, bajya bagira umwuga batahana. Bityo rero mujye mubyiga mushyizeho umuhate. Gusa ariko nimutaha ntimuhite mubona akazi, ntibizabe intandaro yo gusubira aho mwavuye, muzihangane mushakishe ariko mwitwara neza.”

Uruhare rw’Ababyeyi mu burere bw’abana

Musenyeri Anaclet Mwumvaneza yongeye gukebura ababyeyi, abibutsa ko bafite inshingano zo kurera abana babo neza.

“Akenshi usanga abana bajya mu biyobyabwenge ndetse no mu muhanda, basunikwa n’umutekano muke mu muryango, intonganya, kutaba hafi y’abana n’ibindi...Iyo aba bana babaye mayibobo rero, bakura ari ibyihebe n’abajura ku buryo bateza umutekano muke mu gihugu. Ni muri ubwo buryo inzego z’umutekano zihitamo kubazana hano kuri iki kirwa,”

“Ikibazo kiba cyarabayemo ni uguta inshingano k’umubyeyi.”

Musenyeri Mwumvaneza yavuze ko ari agahinda kubona abana bize bari mu bagororerwa Iwawa.

Ati: “Ni agahinda kubona abana nk’aba bize ndetse bava mu miryango ikize ari bo babaswe n’ibiyobyabwenge. Ababyeyi rero turabasaba kugaruka ku burere baha abana babo bakabaha umwanya kugira ngo bafashe igihugu nabo bifasha.”

Uruhare rw’Amatorero na Kiliziya mu guhindura abana barererwa Iwawa

Yakomeje avuga ko nkuko Abanyarwanda benshi barangwa n’ukwemera, 95% by’urubyiruko rwoherezwa Iwawa ruba rubarizwa mu madini cyangwa rwarabyigeze. Aha niho ahera asaba buri dini kugira uruhare mu kubwiriza intama zaryo kugira ngo bifashe mu guhindura urubyiruko ruri Iwawa ndetse no hanze ya Iwawa.

Dr. Jean Damascene Nshimiyimana, Umuhuzabikorwa w’Ikigo ngororamuco cya Iwawa yavuze ko Kiliziya n’amatorero bifasha abana bagororerwa muri iki kigo binyuze mu kwemera.

Ati: “Mu by’ukuri, ukwemera ni ikintu gikomeye kuko gihindura imitekerereze ya Muntu. Iyo twasuwe rero n’abihayimana, duhamya ko bitworohereza umurimo wo guhindura uru rubyiruko.”

Urubyiruko rugororerwa Iwawa rwitwa “Abadaheranwa”; bishatse kuvuga ko ari abadaheranwa n’ibibazo. Kuri ubu Iwawa habarirwa urubyiruko 5182 rukomoka mu turere twose tw'u Rwanda.