Incamake y'Amateka ya Soeur Colette Nyirahategekimana witabye Imana

Soeur Colette yavutse tariki 3 Mutarama 1970, mu muryango w'Abana barindwi avukira muri Paruwasi ya Burehe, muri Diyosezi ya Byumba.

Soeur Colette yinjiye mu Bahosipitaliyeri ba Mutagatifu Marita mu 1994. Yasezeranye Amasezerano ya mbere tariki 5 Nyakanga 1997 naho aya nyuma ayakora tariki 18 Gashyantare 2007.

Nyuma yo kurangiza amasomo y'Ubuforomo, Soeur Colette yakoranye ubwitange n'urukundo umurimo w'Ubuforomo mu Kigo Nderabuzima cya Ruhuha muri Arikidiyosezi ya Kigali kuva 2005 kugera 2011.

Avuye i Ruhuha mu Bugesera yakomereje muri Diyosezi ya Cyangugu mu Kigo Nderabuzima cya Muyange kuva 2011 kugera 2015. Aha uretse ubutumwa bw'Umuforomokazi, Soeur Colette yari n'Umukuru w'urugo yabagamo.

Muri Werurwe 2015, Soeur Colette yagizwe Umuyobozi w'Irerero ry'Abitegura kwinjira mu muryango w'Abahosipitaliyeri ba Mutagatifu Marita. Ubu butumwa akaba yarabukoranye ubwitange n'ubushishozi mu gihe cy'imyaka 7.

Muri Kanama 2022 yavuye mu Irerero kubera uburwayi ajya kwivuriza mu gihugu cy'u Busuwisi. Yamaze muri iki gihugu akurikiranwa n'Abaganga ariko ntibabasha kumuvura. Yagarutse mu Rwanda kuhakomereza kwivuza. Tariki 24 Nzeri 2025, yajyanwe mu bitaro bya Kabgayi akomeza kwitabwaho n'abaganga kugera tariki 16 Ukwakira 2025 yitaba Imana.

Igitambo cya Misa yo gusezera kuri Soeur Colette kizaturirwa muri Bazilika ya Kabgayi kuwa mbere tariki 20 Ukwakira 2025, guhera Saa Sita.

Imana imuhe iruhuko ridashira.