Karidinali Antoni Kambanda yayoboye umuhango wo gushyira Mama Maria Carola Cecchin mu bahire ba Kiliziya

Umuhango wo gushyira mu rwego rw’abahire Mama Maria Carola Cecchin , umubikira wo mu muryango w’ababikira bisunze Mutagatifu Yozefu Cottolengo wabereye kuri Sitade ya Kinoru, Diyosezi ya Meru muri Kenya ku wa Gatandatu tariki 5 Ugushyingo 2022, witabirwa n’abantu mu ngeri zitandukanye biganjemo abihayimana bo mu miryango itandukanye ikorera ubutumwa muri Kenya, abo mu muryango Mama Maria Carola yakoreragamo ubutumwa, abayobozi ba Kiliziya Gatolika muri Kenya, Abahagarariye inzego z’ubutegetsi muri iki gihugu, n’imbaga y’abakristu gatolika bo muri Kenya.

Mu butumwa yagejeje ku bitabiriye uyu muhango, Nyiricyubahiro Antoni Karidinali Kambanda Arkiyepiskopi wa Kigali watoranyijwe na Papa Fransisiko ngo azabe ari we unawuyobora yavuze ko Mama Maria Carola yabaye urugero rwiza rw’umumisiyoneri wagaragaje urukundo rwitangira abandi rutizigama; akaba n’urugero rw’abamisiyoneri benshi bari hirya no hino ku isi bagifite uyu mutima w’ubwitange no kwemera guhara amagara yabo kugira ngo umukiro w’Imana ugere kuri bose.

Yagize ati “Mama Maria Carola yagaragaje ukwemera gushitse afitiye Imana ubwo yemeraga kuza kuri ubu butaka kugira ngo yigishe abahatuye urukundo rw’Imana.” Ati “Ni inema idasanzwe Imana yanyujije mu muryango w’Aba Cottolengo bose bitangira ubutumwa bwo kwita ku bakene, abarwayi n’abandi bababaye hano muri Afurika. Mama Maria Carola yatweretse urugero twareberaho muri ibi bihe turimo. Yakoreshe igihe cye aharanira ikuzo ry’Imana n’ishema rya Kiliziya muri iki gihugu, uyu munsi natwe nibyo duhamagarirwa.”

Mama Maria Carola Cecchin washyizwe mu bahire ba Kiliziya kuri iyi tariki yavutse tariki 3 Mata 1877 i Cittadella mu Butaliyani, yitabye Imana ku wa 13 Ugushyingo 1925, mu mpanuka y’ubwato bwarohamye mu nyanja itukura yo mu majyaruguru ya Afurika ubwo yari mu rugendo avuye muri Kenya asubiye kwivuza mu Butaliyani.

Urugendo rw’ishyirwa mu batagatifu ba Kiliziya Gatolika Mama Maria Carola Cecchin rwatangijwe n’igitangaza cyabaye mu 2013. Nk’uko ACI-Africa ibitangaza, tariki 14 Mata 2013 mu gace kitwa Matiri, i Meru muri Kenya umugore wari ku bise ategereje kubyara yagize ibizazane bitoroshye muri iki gikorwa, ababikira b’abaganga bari kumwe na we birabashobera bajya ku mavi bambaza Imana ngo igaragaze ububasha bwayo muri iki gikorwa.

Nyuma y’iminota mike batangiye gusabira uyu mugore wari ku bise utari worohewe na gato, wa mugore yibarutse umwana w’umuhungu ariko afite ikibazo cy’umutima utarabashaga gutera. Umwe muri ba babikira b’abaganga witwa Katherine yakomeje isengesho,maze aritura Imana abinyujije kuri Mama Maria Carola. Mu minota mirongo 30 wa mwana yahise atangira guhumeka neza aba muzima; n’uyu munsi ariho, ababyeyi be bamwise Msafiri Hilary Kiama.

Nyuma yo kumenyekanisha ibyo iki gitangaza no kugikoraho ubushishozi Mama Maria Carola Cecchin yashyizwe mu rwego rw’abagaragu b’Imana rubanziriza urwego rw’abahire. Abaye umubikira wa kabiri ushyizwe mu bahire muri Kenya nyuma ya Mama Irene Stefani umubikira ukomoka mu Butaliyani wo muryango w’ababikira bitwa Consolata Missionary Sisters na we witangiye ubutumwa muri iki gihugu, yashyizwe mu bahire muri Gicurasi 2015.