Karidinali Matteo Zuppi yagaragaje impungenge atewe n’ifungwa rya Myr Rolando Jose Alvarez Lagos wo muri Nikaragwa

Karidinali Matteo Zuppi, Perezida w’Inama y’Abepiskopi Gatolika mu Butaliyani, n’umwepiskopi wa Bologna yatangaje ko Inama y’Abepiskopi Gatolika mu Butaliyani yifatanyije na Kiliziya Gatolika muri iki gihugu, anavugako gufunga Myr Rolando Jose Alvarez Lagos Umwepiskopi wa Matagalpa ari igikorwa kidasanzwe“A very serious act.”

Ibi Karidinali Zuppi yabigaragaje mu ibaruwa yandikiye Musenyeri Carlos Enrique Herrera Gutierrez, umwepiskopi wa Jinotega, akaba na Perezida w’Inama y’Abepiskopi Gatolika muri Nikaragwa. amugaragariza ko Inama y’Abepiskopi mu Butaliyani abereye Perezida yifatanyije na Kiliziya Gatolika muri Nikaragwa mu bihe bitoroshye by’itotezwa irimo.

Karidinali Omello, Perezida w’Inama y’Abepiskopi Gatolika mu gihugu cya Espanye na we yatangaje ko ababajwe n’ibiri kubera muri Nikaragwa. Ni mugihe abakristu gatolika muri Nikaragwa nabo bakomeje kugaragara ku mbuga nkoranyambaga no ku mihanga bafite ibyapa bisaba leta y’iki gihugu kurekura Myr Rolando Jose Alvarez Lagos.

Mubutumwa yagejeje ku mbaga y’abakristu bitabiriye isengesho rya Angelus ryo ku cyumweru tariki 21 Kanama 2022 i Roma, Nyirubutungane Papa Fransisiko yatangaje ko ababajwe n’ibikomeje gukorerwa Myr Rolando Jose Alvarez n’inzego za leta zishinzwe umutekano muri iki gihugu, akanababazwa n’akarengane gakomeje gukorerwa abakristu gatolika muri iki gihugu. Avuga ko akomeje gukurikirana ibibera muri iki gihugu umunsi ku wundi.

Papa Fransisiko yagize ati “ Ndimo gukurikirana ibirimo kubera mu gihugu cya Nicaragua, bigirwamo uruhare n’abaturage ndetse n’inzego za leta; ndemeza ntashidikanya ko mu bworoherane no mu biganiro hazavamo igisubizo mu buryo bw’ubwubahane kandi bw’amahoro. ”

Polisi yo muri iki gihugu itangaza ko Myr Rolando Jose Alvarez Lagos agikorwaho iperereza ku byaha bijyanye no gufatanya n’abatavuga rumwe n’ubutegetsi bw’iki gihugu mu myigaragambyo yo kuva mu 2018.

Ifungwa rya Rolando Jose Alvarez Lagos rije rikurikiye ibindi bikorwa bihagarika imirimo ya kiliziya byabaye mu mezi yashize birimo iyirukanwa ry’umuryango w’ababikira ba Mutagatifu Tereza, ihagarikwa ry’amaradiyo akora iyogezabutumwa gatolika, ifungwa ry’imwe mu miryango itegamiye kuri Leta n’ifatwa rya bamwe mu bapadiri bo muri iki gihugu.

Umunyamategeko Martha Patricia we avuga ko Kiliziya Gatolika muri iki gihugu imaze gukorerwa ibikorwa by’urugomo bigera kuri 250 birimo guhumanya za Kiliziya, ibitero byitwaje intwaro, gutwika no gusahura.