Karidinali Matteo Zuppi yagiriye uruzinduko muri Ukraine

Ku munsi wa mbere w'uruzinduko rwe, Karidinali Zuppi yasuye ikigo gifungirwamo abafatiwe ku rugamba cya Zakhid-1 giherereye mu karere ka Lviv, gifungiyemo abasirikare bafatiwe ku rugamba barwanaga ku ruhande rw'u Burusiya. Yabagejejeho impano n'ubutumwa bwa Papa Leo XIV, ababwira ati "Papa akomeje kubasabira." Yanagaragaje icyizere ko "vuba aha muzashobora gusubira mu miryango yanyu."

Karidinali Zuppi yari aherekejwe na Myr Visvaldas Kulbokas, Intumwa ya Papa muri Ukraine, na Andrii Yurash, Ambasaderi wa Ukraine muri Vatikani. Basuye icyo kigo, bareba imibereho y'abafashwe ku rugamba, basura shapeli n'ivuriro bibafasha mu mibereho yabo ya buri munsi.

Mu rwego rwo kubagezaho ubutumwa bwa Papa Lewo wa XIV, Karidinali Zuppi yabashyikirije impano eshatu zirimo urufunguzo (keychain), ishusho ya Bikira Mariya n'ifoto ya Papa Leo XIV.

Asobanura impano y'urufunguzo, yavuze ko ari ikimenyetso cy'icyizere cyo kuzongera gufungura imiryango y'ingo zabo no guhura n'imiryango yabo.

Yagize ati "Papa yansabye kubazanira uru rufunguzo. Nizeye ko vuba aha muzakingura imiryango y'inzu zanyu, mukongera guhura n'abanyu."

Yabasobanuriye kandi ko ifoto ya Papa Leo XIV yari igamije kubereka ko Papa abakomeje kuzirikana no kubasabira.

Yagize ati "Papa Leo yanyoherereje hano kugira ngo mbazanire icyizere. Ari kubasabira, asaba ko intambara irangira kandi ko mwazongera gusubira mu miryango yanyu mugatangira ubuzima bushya."

Nk'uko byatangajwe n'ikinyamakuru cyo mu Butaliyani Avvenire, Karidinali Zuppi yanabonanye n'abasirikare b'Abarusiya bafashwe ku rugamba, yumva ibibazo n'ibyifuzo byabo ndetse arabahumuriza. Mu bo yahuye na bo harimo umusore w'imyaka 25 watakarije ukuguru ku rugamba, amusabira kuzabona akaguru k'ugukorano.

Ku bijyanye n'ishusho ya Bikira Mariya , yavuze ko ku Bakirisitu ari ikimenyetso cy'uburinzi bwa Bikira Mariya, Nyina wa Yezu, ariko ko no ku batari Abakirisitu ishobora kuba ikimenyetso cy'ihumure n'icyizere mu bihe bikomeye.

Uru ni uruzinduko rwa kabiri Karidinali Zuppi agiriye muri Ukraine kuva intambara yatangira. Urwa mbere yarugiriye muri iki gihugu ku wa 5 no ku wa 6 Kamena 2023, abisabwe na Papa Fransisiko, aho yahuye n'abayobozi ba Ukraine mbere yo gukomereza ubutumwa bwe mu Burusiya, muri Leta Zunze Ubumwe za Amerika no mu Bushinwa.

Mu gusoza uruzinduko rwe kuri icyo kigo, Karidinali Zuppi yasengeye amahoro muri Ukraine, asabira ko intambara yahagarara ndetse anasabira abafashwe ku mpande zombi kuzabona amahirwe yo gusubira mu miryango yabo no kongera kubaho mu mahoro.

Iyo gahunda yihariye yari igamije gushyigikira ibikorwa by'ubutabazi, birimo gufasha mu kugarura abana ba Ukraine bajyanywe ku gahato, koroshya ihererekanywa ry'abafashwe ku mpande zombi z'intambara no gushakira ubufasha abaturage bibasiwe n'ingaruka zayo.

Biteganyijwe ko muri uru ruzinduko rw'iminsi ine azakomeza kugirana ibiganiro n'abayobozi ba Leta, abayobozi ba Kiliziya ndetse n'abandi bafite uruhare mu gushakira umuti amakimbirane akomeje hagati y'u Burusiya na Ukraine.